Shen ka sorkar kan wanrah ia ka skhim Elektrik Taxi, ong MR

U Myntri Rangbah ka jylla u Conrad K Sangma ryngkat ka jingdonlang u khlur ak phlim ba pawnam ka Bollywood u Milind Soman lem bad ki heh sorkar, hynne ka sngi ha ka jingpyllait paidbah ia ka Public Electric Bicycle sharing System, ki la niah tawiar da ka cycle na Parking Lot, SBI ter ter shaduh khyndailad.Ka jingpyllait ia kine ki Bicycle ka long shibynta ban ai jinghikai ban kilan met ban wanrah ia ka koit ka khiah bad kumjuh ban pyllait ia ka jylla na ka jingjaboh ka lyer. Haba kren sha ki lad pathai khubor, u Conrad ula ong ba ia kine ki Electric Bicycle ki paidbah hapdeng kano kano ka rta ruh ki lah ban shim wai ban pyndonkam lada ki kwah ban niah.U la ong ba kine ki cycle ki long kiba suk bha ban niah ha kaba ym da donkam eh ban pynmih bor ban niah ban kyllain ia u Pedal namar ba ia kine ki cycle la shna da ki electric ha kaba lah ban pyndonkam da ki Gear ban pyniaid ia ka cycle.U Myntri Rangbah ula ong ba kine ki cycle ki iahap bha ban niah ha nongbah Shillong bad kane kadei kawei na ki project kaba heh ban pyllong ia ka Shillong kum ka nongbah ba lah ban iaid kjat bad iaid cycle ha kaba ki briew kim donkam ban pyndonkam ia ki kali.

“ Yn pyllong ia nongbah Shillong kum kawei na ki jaka iaid kjat bad ka jaka ba lah ban niah ia ki cycle bad ngi ai mynsiem ia ki paidbah ba kin pyndonkam da ki kali elektrik, elektrik Bicycle,” ong u Conrad.U Myntri Rangbah ula ong ruh ba ka sorkar shen kan sa wanrah ia ka skhim na bynta ban pynmih sa ia ki Elektrik Taxi bad shen kin ioh ruh ia ka 1st Installment na bynta ban wanrah ia ki 50 tylli ki elektrik bos.Katkum ka jingong u Conrad, ka sorkar ka la pyrshang ban pynheh ia ki surok ha ki bynta ka sorkar Shillong kum ha khyndailad, Polo ter ter ban pykylluid ia ka sor Shillong bad ka sorkar ka la sdang ia ka jingpynkynriah noh ia ki ophis sorkar khnang ba ki paidbah ki lah ban pyndonkam kum ka lynti iaid kjat bad iaid cycle. Ha kajuh ka por, ula ong kaba sngew lyngngoh ka long ba ki paidbah ki kwah ba ka jylla kan don ia ka jingkylla hynrei kim kwah pat ban iohi ia ka jingkylla. Namar kata ula kyntu ia ki paidbah ba kin ai ka jingkyrshan ia ka sorkar haba ka wanrah ka jingkylla ia ka jylla.

Ula kyntu ruh ia ki paidbah ba haba ki shim wai ki dei ban burom ban sumar ban lehkhuid ia ki tiar haba ki pyndonkam khnang ba kiwei ruh kiba niah hadien kin don ka jingsngewtynnad haba khuid ka tiar.