Shen yn sdang pynheh surok Weiloi-Mawkyrwat sha Intermediate Lane: Tynsong

U Symbud Myntri Rangbah ka Jylla ba dei peit ia ka tnat PWD (Roads), Bah Prestone Tynsong ha ka Sngi Thohdieng u la pynbna ba ka jingpyntrei ia ka surokbah Intermediate lane naduh na Weiloi sha Rangthong lyngba ka Mawkyrwat kan sa urlong noh ha kine ki khyndiat bnai ban wan, bad kane kan pynurlong ia ka jingangnud ba la da ki phew snem jong ki paidbah ka South West Khasi Hills District. Ia kane u Bah Prestone u la pynbna mynta ka sngi ha ka jingialang pynhap pyrda ia ka jingrakhe ia ka jingdap shispah snem jong ka shnong Mawkyrwat ha Madan Balang Presbyterian Mawkyrwat ha ka jingiadonlang u MLA ka Mawkyrwat, bah Renikton L Tongkhar, u Deputy Commissioner, Bah B. Mawlong u Superintendent of Police, Bah B. Jyrwa, u Myntri ka shnong Mawkyrwat, Bah R.R. Lyngkhoi, u MDC barim ka Mawkyrwat, bah Carness Sohshang lem bad kiwei kiwei ki riew rangbah.

Haba kren ha ka jingialang, u Bah Prestone u la iathuh ba mynshwa ka Sorkar Pdeng ka la pdiang ban kyntiew kyrdan noh ia ka surok Shillong-Mawkyrwat sha ka National Highway, hynrei namar jong ka jingkylla ha ki rukom treikam ha u snem 2014-15, kane ka surok kam shym la rung shuh ha ka thup jong ki surokbah National Highway hapoh ka Ri. “Na ka liang jong u MLA jong phi u la kren shaphang ka jingangnud ki paidbah ban ioh noh ia ka surok ba kham bha bad kham heh na Shillong sha Mawkyrwat, bad mynta nga kwah ban pyntip sha phi ba watla ngim pat ioh ia ka kyrdan National Highway, hynrei ka sorkar jylla kan pynkylla noh ia kane ka surok sha ka State Highway. Ha kine ki khyndiat bnai ban wan, ngin sa sdang ban pyntrei noh ia kane ka projek naduh Weiloi sha Rangthong lyngba ka Mawkyrwat bad ka ‘standard’ jong kane ka surok kan long kumjuh kum ka surok Weiloi sha Mawphlang,” ong u Bah Prestone.

Haba kren shaphang ka jingrakhe dap 100 snem jong ka shnong Mawkyrwat, u bah Tynsong u ïaroh ïa ka shnong Mawkyrwat kum kawei na ki shnong ba pawnam ha ka jylla ha kaba ka la pynmih shibun ki nongialam kiba la noh synñiang ïa ka ‘Jaitbynriew’ bad ïa ka jylla hi baroh kawei. “Hooid, watla ka Mawkyrwat kam dei ka shnong kaba heh, hynrei kadei ka jabieng jong ka South West Khasi Hills District bad kadei ruh ka jabieng jong ka ‘Jaitbynriew’,” la bynrap u bah Prestone.Ha kane ka sngi kum ka dak jong ka jingiashimbyntalang ha kane ka jingrakhe ia ka jingdap 100 snem ka shnong Mawkyrwat, na ka liang jong u bah Prestone u la aiti ia ka ‘work order’ kaba T.20 lak sha ka shnong Mawkyrwat na ka bynta ban shna ia ka madan ialehkai phutbol lyngba ka skhim Chief Minister Special Development Fund (CMSDF). Ha kane ka sngi la ioh ruh ban plie paitbah ïa u motdur jong u (L) Tbn. Rosaia Nongrem, u Myntri ba nyngkong eh jong ka shnong Mawkyrwat uba dei ruh u MDC barim bad u Chairman barim jong ka United Khasi-Jaiñtia Autonomous District Council. Nalor kane, ka la don ruh ka jingpyllait paitbah ïa ka Website, ka History bad ka Souvenir jong ka shnong Mawkyrwat.