Shim bynta da ki spah ki samla ha ka Shad Lyngdoh Raid Wahkhen

Da ki spah ngut ki nongshad kynthup ki kynthei bad shynrang ki la shim bynta ha ka ‘Shad Lyngdoh’ ba la pynlong da ka Dorbar Raid Wahkhen Khyrim Syiemship ha ka Madan Shad, Wahkhen hynne ka sngi bad la sakhi da ki nongjngohkai na kiwei ki jaka. Ia kane ka Shad Lyngdoh, la wan ban sakhi da u Symbud Myntri Rangbah ka jylla u Bah Prestone Tynsong, u Syiem ka Hima Khyrim u Paiem (Dr) Balajied Sing Syiem, u Secretary ka Shad Lyngdoh Raid Wahkhen u Bah Teken Khongwet, u Sordar ka Raid Wahkhen u Bah Jansing M Tynsong bad kiwei kiwei kiba la shah khot sngewbha. Haba batai shaphang kane ka shad tynrai, u Bah Jansing M Tynsong ula ong, ha kane ka Shad la iashimbynta tang da ki thei sotti bad ki rangkynsai kiba la shad da kaba bud ryntih ia ki sur jingsawa kiba mih na ki jingtem jingput bad hashwa ban pynlong ia kane ka shad, la pynlong ia ka lehniam lehrukom, ka nguh Blei dem Blei kaba la ialam da ki Saw Tymmen kaba 3 sngi bad ha ka sngi kaba 4 pat la pynlong ia ka Shad.

Ula iathuh, ia ka Shad Lyngdoh la pynlong ha ka aiom Pyrem kaba dei ka aiom bet aiom thung ia ki jhur ki jhep, ki soh ki pai, ki syntiew ki skud, ki dieng ki siej bad la pynlong ia ka shad ha ka sngi Iew Shyllong ynda la pyndep ia ka nguh ka dem ha ka Duwan Mawlyngdoh Lum Lawlyngdoh ha ka jaka kaba don marjan bad ka Wahduid kaba la tip kum ka Umthli bad dei ban pyndep ha ka sngi Rynghep. U Bah Jansing ula ong, kane ka lehniam kadei ban ainguh ia u Blei nongbuh nongthaw halor ki jingkyrkhu kiba ula theh sei ha baroh shi snem lyngba ka kheit ka ot bad ka peh ka tai bad la nguh la dem ruh hashwa ban sdang ia ka bet, ka thung ka tep khnang ba u Blei un iai kyrkhu ia kane ka snem. Ula ong ba la kyrpad ruh ia u Blei bay n theh ia ki jingyrkhu khnang ba kin ia roi parum pareh ryngkat bad ka burom ka akor, ka koit ka khiah, ka jingnang jingstad bad kumta ter ter. Ki nongshad kiba kynthup ia ki kynthei bad shynrang kiba la iashimbynta ha ka shad kila phong la kup da la ka riam tynrai bad ki jingdeng kiba nylla, kaba la pyniphuh iphieng ia kane ka shad.

Na ka liang u Symbud Myntri Rangbah ka jylla u Bah Prestone Tynsong ula pynpaw ia ka jingkmen bad jingsngew sarong halor ka jingshimkhia ka Raid Wahkhen ban pynneh pynsah bad pynlong man la ka snem ia ka Shad Lyngdoh. U Bah Prestone ula pynpaw ruh ia ka jingsngewkhia ba katba nang iaid ki snem ki nongshad kila nang bun hynrei ka jaka shad pat ka long kaba rit bad ula ong ba hadien 5-6 snem lada mih bun palat ki nongshad kan long kaba eh ban pynlong ia kane ka shad ha kane ka madan kaba mynta, kumta kum u MLA ka thain ula shimkhia ia kane da kaba iakren bad u Sordar ka Raid Wahkhen ban wad jaka khnang ba yn ioh tei ia ka jaka shad kaba heh, khamtam haba kane ka shad kala khring ym tang ia ki paidbah hynrei wat ia ki nongjngohkai pyrthei ruh.