Shim bynta ki samla Balang Katholik ban iasyllok shwa ka jingrakhe Khristmas

Ban tehsong ia ka jinglong kawei, ka jingiakyrshan lang ban kyntiew ia ka kam shakri Blei bad ban wanrah ia ka jingieid hapdeng ki para samla, ka Seng Samla Katholik Sub District Nongpoh, ka la ioh ban pynlong da ka prokram ban iakynduh lang hapdeng ki samla na ki 21 tylli ki Balang Shnong ia kaba la sdang ha ka 13 bad 14 tarik Nohprah 2024 ha ka Parish Hall Nongpoh. Ia kane ka prokram ka jingiakynduh lang jong ki samla na ki 21 tylli ki Balang Shnong ba kdup da ka Seng Samla Katholik Sub District, la pynlong kyrpang ruh kum ka jingiasyllok para samla ha shwa ka jingrakhe ban pdiang ia ka Christmas ka sngi wan long briew u Trai Jisu Khrist sha kane ka sla pyrthei. La shimkhia kyrpang ia kane ka prokram, da u Samla Johna Ryntathiang, kum u President lem bad ki dkhot ha kaba la pynshongkun ia ka prokram ba arsngi lyngba ki jingiakop bapher bapher bad ka jingiatai bad jingiamir jingmut para samla ban kyntiew ia ka kam shakri Blei hapoh ka Balang.

La wan ban pynhap pyrda noh ia kane ka prokram, da u Bah Mayral Born Syiem, MLA ka Nongpoh Konstituensi kum u kongsan ha ka jingiadonlang ruh u Bah Balajied Rani, MDC, u Brother Quirinus War, Sr. Magret kharmuti, Katekis Silarius Lyngdoh lem bad ki Nongialam ka Sub-District. Kumba la pynpaw, ba ka Seng Samla Katholik Sub-District Nongpoh ka kdup pat ïaki 21 tylli ki balang shnong ka la ioh ban shim ia ka sienjam kaba nyngkong ban pynlong ia kum kane ka prokram daka jingthmu ban wanrah ïaka jingïatylli lang para samla hapoh ka Balang ban wanrah ïaka jingiadei kaba ïa jan ïaki samla bad ki kam jong ka Balang bad ha kajuh kapor ban ailad ruh ïaki khun samla ka Balang ban ïoh iaka lad ban ïa lehkmen lang haka kyrteng u Blei khnang ba kin nym sakma ha kane ka rongphong pyrthei. U Bah Mayral Born Syiem, haba ai jingkren u la pynpaw ia ka jingkmen kaba khraw ban ia don bynta lang ha kum kane ka prokram lehkmen ki samla ka Balang Catholic ha Nongpoh kaba la ai mynsiem shikatdei ia u ban sakhi ba ka jingiatylli bad ka jinglong kawei ka skhem hapdeng ki samla jong ka Balang ban rah ia ka nam bad ka jingshakri Blei.

U la pynpaw ruh, ba da shisha kane ka juk kaba mynta ka long kaba eh shisha ia ki khun samla kiba hap ban iaid napdeng shibun ki jingtynjuh bad ki jingshah pyngngop ha ki rong phong pyrthei, hynrei tang ka mynsiem kaba skhem bad kaba iaineh ha u Trai Jisu Khrist, ki samla kin lah ban iakhun ia kine ki jingsniew ba la kynrei ha kane ka pyrthei, u la kitbok kitrwiang ruh ia baroh ki samla ba kin nang iaineh kum kane ka mynsiem iatylli bad ban pynskhem ia ka jingshakri Blei hapoh ka Balang ne ha ki shnong ki thaw, da kaba phah ruh ia ka khubor ba bha halor ka jingwan long briew jong u Trai Jisu Khrist bad ban pdiang ia u snem ba thymmai.