Shim bynta u Conrad Sangma ha ka Jubili Rupa ka ICYM ha Kerela

U Myntri Rangbah ka jylla u Conrad K Sangma hynne ka sngi ula iashim bynta ha ka jingpynhap pyrda ia ka jingrakhe Jubili Rupa ne Silver Jubilee jong ka Indian Catholic Youth Movement (ICYM) ba la pynlong ha Divine Retreat Centre ha Kerala. Ia ka Mass Bakhuid la ialam da u Cardinal Felipe ka Goa bad u President jong ka Conference of Catholic Bishops of India (CCBI). U Conrad Sangma ha ba ai jingkren, ula ai khublei ia ka ICYM halor ka jingkynjoh 25 snem ha ka jingshakri bad ula ban jur ia ka jingkongsan ban long ki nongsakhi ba shlur bad ban im tang ha kawei ka jingngeit ha jingim ka jong ki.

U Myntri Rangbah ula kyntu ia ki samla ban long ki nongtbeh jingshai ia ka jingkyrmen bad ban ieng skhem ha ka jingiakhun ia ki jingtynjuh bad ban pyndonkam ia ki rynsan ban ialap ia ka jingshisha, ka hok bad ka jingsngewsynei bad ula kyntu ia ki samla ba kin buh hakhmat ia ka jingbit jingbiang, ban beh ia ka jingpyntbit ia ka sap ka phong bad ban pyndonkam ia ki kor teknoloji kum ki atiar jongka jingshisha bad ka jingsbun. Nalor kane ula iaroh ia ka ICYM kaba la sei ia ki nongialam kiba burom ia baroh, ban pynpun ia ka jingkieng jong ka jingleh synei bad ban ai mynsiem ia ka kolshor ha ka jingai jingshakri bad ula ai khublei ruh ia ka ICYM ha ka jingrakhe iaka jubili rupa bad ula kyntu ia ki samla ba kin long ki nongwanrah ia ka jingkylla hapoh ka iingmane, ka ri bad ha ka pyrthei.

U la kyntu ruh ban tei ia ka jingkieng kaban ym pyniapait iapara bad ban ai jingshakri kaba kyllum ia baroh, bad pdiang ia ka jinglong salonsar, ka jingshlur bad kaj ingsngew synei. U Conrad ula kyntu shuh shuh ia ki samla ban pyndonkam ia ki kor Digital ban tei ym ban pynpra bad ula ong ban saindur ia ka jingsengkam lajong kaba iadei bad ka imlang sahlang bad kaban kyntiew ia kiba duna bad lah ban pyniadei bad kiwei pat kiba don ha kylleng satlak ka pyrthei.