Shim bynta u Lamphang ka Iingdorbar ha ka Commonwealth Parliamentary ha Nagaland

U Lamphang ka iingdorbar thawain ka jylla u Thomas A Sangma ryngkat bad u Symbud Lamphang ka jylla u Limison D Sangma ki la shim bynta ha ka 22nd Annual Conference ka Commonwealth Parliamentary Association (CPA), India Region Zone-III ha Nagaland Legislative Assembly ha Kohima naduh ka 9 haduh ka 13 tarik Naiwieng 2025. Ia kane ka jingialang la plie hynne ka sngi Nyngkong da u Lamphang ka Lok Sabha u Om Birla, uba la pynpawba ka thain shatei lammihngi ka dei ba riewspah ha ka jingdon ia ki kolshor barim bad ki jinglong kyrpang bad ba khlain ha ka synshar paidbah bad ula iaroh ia ki iingdorbar thawain ka thain shatei lammihngi ia ka jingiatylli ban thaw ia ki polisi na ka bynta ka jingangnud ka thain kaba la noh synniang ia ka roi ka par bad ia ka ioh ka kot ka thain.

U Lamphang ula ban jur ia ka jong kongsan ban kyntiew ia ka roi ka par ha ka thain, ka jingkiew ki karkhana bad ka jingpyndonkam ia ki teknoloji bad Artificial Intelligence ban pynkhlain ia ka jingtreikam kaba khuid ba suba bad ka jingai jingshakri kaba don ia ka jingkitkhlieh bad ula ai ruh ka jingiaroh ba kiba bun ki iing dorbar thawain ha ka thain shatei lammihngi kila iaid shakhmat mynta ban ym pyndonkam shuh ia ki kot ki sla, bad ban pyniaid beit pyniaid ryntih ia ka rukom treikam. Katba u Thomas A Sangma ula ong, “Lyngba ka jingpyntreikam ia ka jingiaid shakhmat bad ki jingiohi jngai jong ki kam iing dorbar thawain, ka iingdorbar kala pynwandur ia ka rukom treikam ban kyntiew ia ka ioh ka kot, ka jingiaryngkat ha ka imlang sahlang, ka jingiada ia ka mariang bad ka jingiaid shakhmat lyngba ki kor ki bor.

Ula ong, ba ka jingtreikam ryntih jong ka iing dorbar thawain kan pynthikna ba ka synshar khaddar kan long kaba lah ban don ia ka jingkitkhlieh bad kaba lah ban ai ia ka jingkhein bad kaba khuod ba suba bad kaba buh hakhmat ia ki paidbah. Lyngba ki jingkylli, jingiatai bad ki jingiakren ha ki Committee, ka iingdorbar thawain ka bat ia ka jingkitkhlieh kaba kongsan ha kavan pyntreikam ia ki polisi bad ki prokram. Baroh ki Lamphang bad ki Symbud Lamphang bad ki Commissioners & Secretary, ki Secretary bad ki heh ophisar jong ki iingdorbar thawain na ki jylla ka thain shatei lammihngi kila wan iashimbynta ha kane ka jingialang.