Shim bynta u Symbud Lamphang ha ka jingïalang ba 85 ka All India

Ka kynhun ba la ïalam da u Symbud Lamphang ka Iingdor thaw ain ka Meghalaya u Timothy D Shira bad u Commissioner & Secretary u Bah Andrew Simons ki la leit shim bynta ha ka jingïalang kaba 85 jong ka All India Presiding Officers’ Conference kaba la long ha Nongbah Patna, ka Jylla Bihar kaba la long naduh ka 19 tarik haduh 21 tarik mynta u bnai. Ia ka jingialang All India Presiding Officers’ Conference la plie da u Lamphang ka Lok Sabbha u Om Birla bad u Deputy Chairman ka Rajya Sabha u Harivansh U Timothy Shira u la ïashim bynta ha ka jingiatai halor ka phang pdeng “75 Anniversary of the Constitution: Contribution of Parliament and State Legislative Bodies in Strengthening Constitutional Values”. U Bah Andrew Simons u la iashim bynta haka Conference jong ki Secretaries jong ki Legislative Assemblies halor ka phang pdeng “Adoption of Modern Technologies in Our Legislative Bodies for Greater Efficiency, Effectiveness, and Productivity”. Haba kren ha ka jingdap 75 snem jong ka riti synshar ka ri India, u Timothy Shira u la batai ia ka riti synshar kum ka kot kaba iaid shaphrang bad kaba im kaba shakri kum ka mynsiem jong ka synshar paidbah jong ka ri India.

“Ka Riti Synshar jong ka ri India, kaba la pdiang ha ka 26 tarik u Naiwieng 1949, la shim ba ka dei kawei na ki Riti Synshar kaba la iaid shaphrang tam ha ka pyrthei. Ka iada ia ka synshar ain bad ka pynthikna ia ka jingsynshar paidbah, ka jingbishar hok ha ka imlang sahlang, bad ka hok jong uwei pa uwei. La pynkylla ia ka 106 sien naduh ba la pynlong ain ia ka ha u snem 1950, kaba pyni ia ka jinglah ban shimkhia ia ki jingdonkam kiba nang kiew jong ka imlang sahlang” la ong u Timothy.U Timothy u la kren ruh halor ka bynta jong ka Parliament bad ki Ïingdorbar Thaw Aiñ jong ki Jylla ban kyntiew ïa ki jinglong tynrai jong ka riti synshar ka ri.“Ka Parliament jong ka Ri India bad ki Ïingdorbar Thaw Aiñ jong ki Jylla ki don ka bynta kaba kongsan ha kaba pynneh ïa ka jingsynshar paidbah, ban ïada ïa ki hok jong uwei pa uwei, bad ban pynroi ïa ka hok ha ka imlang sahlang. Ki aiñ ba pawnam kum ka aiñ Right to Information Act and the Scheduled Castes and Scheduled Tribes (Prevention of Atrocities) Act ki long ki sakhi ïa kane ka jingkular» u la ong. U la pynksan ia ka bynta jong ki bor thaw ain ha kaba pynroi ia ka jingkitkhlieh, ka jinglong kaba shai, bad ka jingroi kaba neh, kaba iadei bad ki nongrim ba kongsan jong ka Riti Synshar jong ka hok, ka jinglaitluid, ka jingiaryngkat.

U Timothy u la pynkut da kaba kyntu ia ka jingpyrshang lang ban weng ia ki jingeh jong kane ka juk, kum ka jingkylla ka suinbneng bad ka jingbym iaryngkat ha ka imlang sahlang katkum ka riti synshar. Naka liang u Bah Andrew Simons, u la pynpaw ïa ka jinglah ban pynkylla dur jong ka teknoloji ba mynta ha ki kam thaw aiñ. U Bah Andrew u la batai bniah ia ki katto katne ki jingthmu ba la shim da ka iing dorbar thawain ka Jylla Meghalaya, kynthup ia ka jingpyntreikam ia ka projek NeVA (National e-Vidhan Application) ha u snem 2022. “Lyngba ka NeVA, ki dkhot mynta ki lah ban aiti online ïa ki Questions, Call Attention Notices, Resolutions bad kiwei ki proceedings. Ka Ïingdorbar ka la plie ruh ïa ka Assembly TV Channel ban pyni ïa ki jingïalang bad ki jingïalang jong ka Sorkar, ban pynthikna ïa ka jingshai kaba kham bha bad ka jingïadei bad ki paidbah» u la ong. U Bah Andrew u la pynpaw ia ki jingbatai jong ka Dorbar lyngba ka kor digital.“Ngi la pynrung ïa ka AI na ka bynta ban thoh ïa ki jingïalang jong ka Ïingdorbar, kaba la ïarap shibun ïa ki nongthoh khubor ban sted ban lum jingtip. La pynbiang ïa ki dkhot jong ka Iing da ki tablet ba treikam daka NeVA In-House daka jingthmu ban pynduna iaka jingpyndonkam iaki kot” u la ong.

U la pynbna ruh ïa ka jingmynjur jong ka Meghalaya ban ïasoh bad ka National Digital Grid bad ban pynïasoh bad ka Digital Sansad App, kaba thmu ban pynïasoh ïa ki bor thaw aiñ hapoh kawei ka rynsan na ka bynta ka jingïasam jingtip kaba khlem jingeh bad ka jinglah ban ïoh ïa ki jingtip.“Ka jingpyndonkam ïa ki kor ki bor kiba mynta ka la wanrah ïa ki jingkylla kiba khraw ha ka jingtreikam bad ka jingmih jong ki rukom thaw aiñ ha Meghalaya. Ka pynthikna ia ka jingsynshar kaba kham bha bad ka jingpynbha ia ka jinglah jong ki paidbah ban ioh ia ki kam thaw ain” u la ong. Ka la long ka dak kaba kongsan ha kaba rakhe ia ka jingdap 75 snem jong ka Riti Synshar jong ka ri India, da kaba pynksan ia ka jingdonkam ban iatreilang ban pynneh ia ki jinglong jong ka ha ka pyrthei.