Shim pisa T.1 hajar uba kam pulit ban pynrung tuh ia ki bar Jylla ha Meghalaya

Ka Khasi Students’ Union (KSU), Umiam Circle hynne ka step sngi Balang, ka la ioh bat ia ki bar jylla ba wan lyngba ka kali ba don u nombor AS 25 CC 4375 bad ka seng ka la suba ba ia kine ki bar jylla la ialam da u briew uba kam ia lade kum u pulit. Katkum ka kyrwoh khubor, ka seng hapoh ka jingïalam jong u President Bashem Kharnaior ha ka por 6 baje mynstep ki lah ioh jingtip ia ka jingdon jong ki Mynder bad la kynnoh ba utei u briew uba la kam ialade kum u pulit ula pyni da ka Police Identity Card kaba don kyrteng Brill Rongpeit, kaba la kam ba la pynmih da ka ophis jong u Commandant, 1st Battalion, Meghalaya Police Mawiong, Shillong.

“Ha ka por jong ka jingïakren bad ka jingbishar, ka KSU ka la lap ba utei u briew u la lum pisa haduh T.1,000 na man la uwei na ki san ngut ki bar jylla kiba la shong ha ka kali kaba don ïa ka number AS 25 CC 4375. Katei ka pisa ka dei kum ka bai rung sha ka jylla. Hynrei ha ka por ba ka seng ka dawa ban pyni ïa ki kot ki sla kiba pynshisha ïa katei ka jinglum pisa, u briew uba kam ialade kum u pulit lem bad kitei ki san ngut ki bar jylla ki la phet krad noh na ka jaka, khlem ai jingpynshai eiei,” ong ka kyrwoh khubor na ka seng. Ka KSU Umiam Circle, ka la ong, “Ka jingdon u briew uba kam ialade kum u pulit bad uba lum pisa na ki bar jylla ban ai lad ia ka jingrung jong ki ha ka jylla, ka dei ka kam kaba die tad dor ïa ka hok bad khein troin ia ki trai jylla bad ka jingpyndonkam bakla ia ka uniform pulit.”

Na ka liang ka seng ka dawa ba ka tnad pulit jong ka Meghalaya Police Department kadei ban pynshai ïa ka jingshisha jong u briew uba la tip kyrteng kum Brill Rongpeit bad kadei ruh ban pynshai la u dei shisha u pulit uba don ha ka kam bad u ba la pyndonkam bakla ïa ka kyrdan ne ka kam jong u, ne la u dei tang u briew uba kam ïalade kum u pulit ban pyniaid ïa ki kam be-aiñ.