Shimti hi ka sorkar ban pynitynnad ia ka Lumpongdeng ha pung Umiam

U Myntri ka tnad bording u Abu Taher Mondal hynne ka sngi, ula iathuh ha ka Iing dorbar ba ka jingaiwai (Lease) ia ka jaka ha Pung Umiam ha ka Maitshaphrang Tourism Promotion Group (MTPG) ka dei la dep ia pynbeit lyngba ka jingiakren sngewthuh jingmut.Haba jubab halor katei ka mat ba la wanrah da u MLA ka VPP na North Shillong Constituency u Bah Adelbert Nongrum kum ka Zero Hour ba ka MTPG kan iakhih ha khmat Secretariat na ka daw ba shah pynduh noh ban ai wai, u Myntri ula ong, “Ia kane ka kam la dep ban iakren pynbeit bniah bad mynta ngi lah ban ia pynbeit da ka jingiakren,”.U Mondal ula iathuh ka ‘Lumpongdeng Island’ ba don ha Pung Umiam kaba heh 1,64,797.48 sqm ne 40.72 akar ka dei kaba long trai da ka MeECL hapoh ka pung Umiam. Ha kaba ka jaka ba 1 akar la ai wai ha ka Maitshaphrang Tourism Promotion Group (MTPG) na ka bynta 10 snem naduh ka 7 tarik u Rymphang 1997 haduh ka 6 tarik u Rymphang 2007 bad ka jingsiew shisnem ka bai wai ka long T.10,000 bad kan don ka jingpynkiew 5% man ka snem bad ka bai wai lah pyniar katkum ka jingkyrpad u nongshim wai.

U Myntri Sorkar ula ong, katei ka jaka mynta la pyndonkam da ka sorkar (MeECL) na ka bynta ban leh ia ki kam pynroi ba bun bha bad la pyntip ia u Chairman jong ka Maitshaphrang Tourism Promotion Group (MTPG), Shillong lyngba ka shithi ha ka 11 tarik Naiwieng 2024 ba kan ym don shuh ka jingpynjlan ban ai wai ia katei ka jaka hadien ka jingai wai ka la kut noh ha ka 31 tarik u Nohprah, 2024. U Mondal ula ong, ka MTPG ka la ioh ka jingjyrpad ban pyllait noh ia katei ka jaka bad ia ki jingtei ba la pynieng katkum ka Clause ba 7  jong ka Lease Agreement kaba la ong,  “Lada ka jaka, ha kano kano ka por ha shwa ban kut ka por jong ka jingiateh kular, lada donkam da ka Board Corporation ban pyndonkam noh ia lade, uba shim wai hadien ba la ioh ka jingpyntip shibnai, dei ban pyllait noh ia ka jaka bad ki jingtei bad ka Board ne ki ban shimti pat kin don ka bor ban pyndonkam, uba shim wai yn ioh ka hok ban weng ia ki jingtei baroh ba la pynieng ha katei ka jaka hapoh shi bnai”.

U Mondal ula ong, “U Chairman ka MTPG lyngba ka shithi ha ka 15 tarik u Kyllalyngkot 2025 ula kyrpad ia ka MeECL ban pynjlan ia katei ka jingai por khnang ba yn lah ban shimkhia ia katei ka mat bad ki bor ba dei peit. Ia katei ka jingkyrpad la pdiang bad pynjlan haduh ka 15 tarik Rymphang 2025 ban ai lad ban iaid shakhmat ban leh ia kaba donkam katkum ka  Clause ba 7 jong ka Land Lease Agreement,”.

Leave a Reply

Your email address will not be published. Required fields are marked *