Shimti u Bah Strong kum u Chairman ka KHADC, kular ban pyniaid hok ia ka Iingdorbar

U MDC ka Voice of the People’s Party (VPP) na Mawkhar-Pynthorumkhrah u Bah Strong Pillar Kharjana ula thaw History namar udei u MDC ba shah jied nyngkong ban shah thung kum u Chairman ka Khasi Hills Autonomous District Council (KHADC) khlem da don ka jingiakhun hapdeng kiwei ki MDC. Haba kren sha ki lad pathai khubor hadien ba shimti kum u Chairman u Bah Strong u la ong ba ka thong kaba hakhmat eh kum u Chairman ka long ban pyniaid iaka Iingdorbar katkum kaba dei hok bad ba kan nym don ka jingnoh shilliang. “Nga ai khublei iaki paidbah ka Mawkhar-Pynthorumkhrah constituency kiba la jied ia nga kum u MDC bad nga ai khublei ia ka Party ka ba la ibit ia nga ban shimti iaka shuki Chairman” la ong u Bah Strong.

“Ngan peit lang iaka bha ka miat jong baroh ar liang kata ka Liangiatei bad ka Liang Synshar ban ngan ai ka lad lang ia baroh arliang bad ba kan nym noh shilliang” la ong u Bah Strong. U Bah Strong u la ong ba kum u Chairman un sa khmih bniah iaki jingai jingmut kiba bun balang haba iadei bad ka jingpynkylla iaki AD Rules ban pynïaid iaka Iingdorbar Thawain.“Ngam pat lah ban ong mynta namar ba nga dang shimti iaka Ophis, ophis ngin sa ia peit ka long kumno, ngin sa leh ia ka badei ban leh” u la ong.

Haba iadei bad ka jingai jingmut ban pynkylla iaki ain ka District Council shak ktien Khasi, u Chairman u la ong “Hoid kala don ka jingpynsngew ia kata ruh bad ka long ka jingpynsngew kaba sngewtynnad, ngin sa ia peit ia kata namar ia mynta mynta hi ngim pat lah ban ong eiei namar kadei bad ki ain, ngi hap ban peit shwa naka liang ki ain ki ong kumno, lada naka liang ka ain ka shah, ngin leh iaka ba donkam”.