Shimti u Dr Shakil kum u Chief Secretary bathymmai

U Bah Donald Phillip Wahlang hynne ka sngi ula shongthait noh kum u Chief Secretary ka jylla Meghalaya bad ula aiti noh ha u Dr. Shakil P. Ahmad ban shimti kum u Chief Secretary bathymmai ka jylla. Ha kane ka jingaiti ia ka kam, la wan ban iadonlang ki heh ophisar IAS ka jylla kiba khmih ia ki tnad bapher bapher ha kaba kila ai khublei ia u Bah DP Wahlang uba la shongthait noh na ka kam bad kila pdiang burom bad kitbok kitrwiang pat ia u Dr Shakil Ahmad uba la shimti kum u CS bathymmai ka jylla. U Dr. Shakil P. Ahmad ula rung ha ka kam IAS ha u snem 1995 ha kaba ula shakri ha ka Prime Minister’s Office bad ula shah thung kum u Director jong ka PMO bad ula ioh ia ka kabu kaba khraw ha kaban shakri ia ki arngut ki Myntri Rangbahduh ka ri u Dr. Manmohan Singh bad u Narendra Modi.

Ula trei ruh bad ka Ministry of External Affairs ha ka Embassy of India kaba don ha Moscow, ha kaba ula pyniaid ia ki kam khaii pateng jong ka ri India sha ki 19 tylli ki ri kiba don ha Eastern Europe, Central Asia, Baltics bad Balkans. Nalor kane ula ong ruh u CEO jongka National Centre for Cold Chain Development (NCCD), CEO ka RECTPCL bad REC PDCL, CMD jongka National Horticulture Board. U Dr Shakil ula long ruh u Chairperson jongka Coconut Development Board, Cochin, u MD jongka National Horticulture Mission & Bamboo Mission bad ula pynwandur bad pyntreikam ia ka Horticulture Revival Package na ka bynta ka Jammu & Kashmir.U Dr. Shakil ym tang ba ula pawnam ha ka kam shakri ka jongu ia ki paidbah hynrei ula ioh pdiang ruh ia ki khusnam hapoh ka ri bad wat na shabar ka ri India.

Ula ioh ia ka UN Award – for Community-Based Tourism, ka British Parliament Award – halor ka jingialam ia ka ri India ban pynpoi ia ka bording elektrik lyngba ka prokram Saubhagya, sha ki 3.6 klur tylli ki longiing bad ka IUCN Award na ka bynta ka jingtei ia ki Fish Sanctuaries. U Dr Shakil ula shah jied ruh ban leh ia ka Master of Public Administration ha University of Texas, USA, ula pyndep ia ka Global Strategy & Leadership ha Cambridge University, UK with Honours bad ula leit ai jingkren maitphang halor ka Climate Change ha Harvard University, SOAS London bad LSE. La kha bad la pynheh pynsan ia u Dr. Shakil P. Ahmad ha Marakkarkandy, Kannur bad nangne ula trei shitom met bad mynsiem ban ioh bat mynta ia ka kyrdan kaba heh tam kam u ophisar ha ka jylla Meghalaya.