Shitaiew aipor ka AKMTTA ia ka sorkar ban iakren ia ki mat jingdawa

Ka kynhun ki nongniah kali Tourist hapoh ka lama jong ka All Khasi Meghalaya Tourist Taxi Association (AKMTTA) hynne ka sngi ki la rai ban ai por shi taiew ia ka sorkar jylla ba ka dei ban khot ia ka jingialang ban iakren ia ki mat jingdawa jong ki.Ia kane ka rai, ka kynhun AKMTTA ka la shim hynne ka sngi ha ka jingïakhih shong kyllain myngngor kaba la pynlong ha Khyndailad, Shillong ban dawa na ka sorkar ba ka dei ban khang ia ka jingioh rung laitlan ki kali kiba nabar ban wan kamai ha kane ka jylla da kaba leit ialam sha ki jaka jngohkai.Ka AKMTTA ka la byrngem ruh ba lada ka sorkar kam leh eiei ia ka jingdawa jong ki ha katei ka por ba la buh, kin pynlong da ka jingiakhih ba kham tyngeh ban ia kane ka jingshong kyllain myrngor.

Haba kren sha ki lad pathai khubor, u President ka AKMTTA u bah Ricaldinus Dohling, ula ong ba ia kane ka jingiakhih la pynlong hadien ba ka sorkar naduh u snem 2023 ka la leh bym patiaw ia ki mat jingdawa jongki.“ Lada phi khot iakren iangi hapoh shi taiew ngin sngap hynrei lada phim sngap ngin pyllong ia ka jingiakhih kaba kham heh ban ia kane ka jingiakhih shong kyllain myrngor,” ula ong.U President ka AKMTTA ula ong ba la slem ki la dawa na ka sorkar ba kadei ban thaw noh ia ki polisi kiba iadei bad ki jaka jngohkai bad khnang ban ailad ia ki nongkamai na kane ka jylla ba kin ialam ia ki briew sha ki jaka jngohkai kiba don ha kane ka jylla.

“Ka sorkar kadei ban pyrkhing noh ia ki kali nabar jylla ba kim dei ban rung sha ki jaka jngohkai hynrei kidei ban ailad ia ki nongkamai trai jylla ba kin ialam ia ki nongwankai sha ki jaka jngohkai ha kane ka jylla,” ula ong.Katkum ka jingong u bah Ricaldinus, ka seng ha ka 25 tarik Jylliew, 2025 ki la iakynduh ia u Myntri Rangbah ka jylla bad ula kular ba shen un sa khot noh ia ka jingialang hynrei haduh mynta la jan dap ar bnai ym shym la don dak eiei ban khot.“ Ko sorkar, wat ju lapmiet tang ban shu pynsngewbha ia ki chamcha, ki dalal jong phi. Hynrei kadei ban pyntreikam noh ia ka jingdawa jong ngi,” ong u President ka AKMTTA.U nongialam ka AKMTTA ula ong ba ka sorkar kam dei ban pyllong ia ki nongniah kali kamai ban mih surok ban iashoh iadat ne ban pyllong ki ‘Gunda’ hynrei kadei ban pynhun ban sngap ia ka jingdawa jong ki.Shuh shuh ula ong ba la bunsien ki la leit sha kamra ki Myntri sorkar, hynrei kim ioh ia ka jubab ba 100 percent hynrei ki la shu pynhun ia ki tang ha kamra bad la kut tang ha ka jingiadihsha.