Shiwait pom u Vishal 2 wait pom u Anand ia u Raja shwa ban pynhap ha Riat

Ki pulit ka jylla Meghalaya hynne ka sngi ki la leit ialam ia ka Sonam Raghuvanshi ryngkat ki 3 ngut sha Sohra ha ka jaka ba ki pyniap ia u Raja Raghuvanshi bad ki la ioh sa kawei ka wait ba la pyndonkam ban pyniap ia u Raja kaba ki la bret shapoh ka riat. Ki pulit ki la ialam ia ka Sonam Raghuvanshi ka kurim jong u Raja bad ia ki 3 ngut kynthup u Akash Rajput, Vishal Singh Chauhan bad u Anand Kurmi kiba la suba donkti ban pyniap ia u Raja ha ka 23 tarik u Jymmang. U SP ka East Khasi Hills District u Bah Vivek Syiem haba iakren bad ki nongpathai khubor ula ong, ba lyngba kane ka jingpynwandur biang halor ka jingjia shah pyniap u Raja, ki lah ioh ia ka dur ba shai kdar bad ki la ring video ruh ryngkat ki nongsakhi shimet bad kane ka jingpynwandur biang ia ka jingjia pyniap ka long kaba seisoh. Ula iathuh la pynlong ia ka jingtokit ha ki 5 tylli ki jaka ba la sdang naduh ka Shnong Mawlakhiat shaduh Weisawdong Parking Lot bad la pynshong nongrim katkum ka jingphla kitei kiba shah kem halor ka jingshah pyniap u Raja.

U Bah Vivek ula ong, “Kine kiba la suba donkti ki la kubur ba ki la leh ia katei ka kam bymmang”. Haba batai bniah shaphang katei ka jingjia shah pyniap, u Bah Vivek ula ong, ba ki la sdang na Mawlakhiat Parking Lot ia kaba ki la pynieng ia ki thuk thuk bad iaid sha ka jaka ba don 3-4 km na Weisawdong Parking Lot, ha kaba ki la sangeh ban shondur bad ha katei ka por ka la don ka jingthmu ban pyniap ia u Raja ha katei ka jaka, hynrei kam shym la seisoh namar ba u Raja ula niah noh ia ka thuk thuk kumta ki la iaid beit noh shakhmat. Ki la sangeh 200 mitar ka jingjngai na ka Weisawdong parking lot bad ha kane ka jaka ki la shon tang ia ki dur bad kam don ka jingthmu ban pyniap. U SP ula ong, “Ngi lah wan ha Weisawdong parking lot, ia kaba la pynieng ia ki thuk thuk ha kaba ki la leit rung sha ka viewpoint bad hadien kane, ngi lah leit sha viewpoint bad ngi lah pynman ba u Raja ula iengkai” ong u Bah Syiem bad ula bynrap “Ban ialeh ban pynwandur biang ia katei baroh, ngi lah ialam ia uwei u dkhot jong ka Fire and Emergency Services ban ak kum u Raja. Ngi lah pynwandur biang ia ka rukom ieng hashwa ban shah pyniap, uba la ieng bad pyni kumno ula shah pom. Ka la don 3 sien ka jingshah pom ia u Raja, banyngkong la pom da u Vishal ba ju khot sin u Vicky, ba-ar la pom da u Anand bad balai  la pom biang da u Anand”. U SP ula ong, “Ia ka wait ka baar la lap na Weisawdong bad kane ka la paw pyrthei ha ka jingtohkit ia kine ki suba donkti kam pyniap briew. Ki la pyni kumno ba ki la bret ia ki ar tylli ki wait. Ia ka wait ba nyngkong la bret bad la lap ka don ia u jingbat rongsoh. Ka wait ka baar ka don ia u jingbat da ka Steel”.

U Bah Vivek ula iathuh ba ka kynhun jong ka SDRF ka la pyndonkam da ki Metal Detector ban lap ia katei ka wait ka baar ba la pyndonkam ban pyniap ia u Raja. Ula ong ba ka SIT kala pynwandur ruh kumno la bret ia ka sopti lieh jong u Akash kaba la lap ryngkat bad ka metiap jong u Raja ha ka 2 tarik u Jylliew bad ki la pyni ruh kumno la bret ia katei ka sopti bad la pynwandur ruh kumno la leh ia ka mobile jong u Raja, ia kaba nyngkong la pynpait bad pynjulor noh da ka Sonam bad hadien da u Vishal bad kumno ki la phet noh na katei ka jaka. U Bah Vivek ula ong, ki pulit ki iengskhem ban Chargesheet kloi ia kane ka Case bad ula ong ba ki pulit kin sa ialam sha ka iingkashari ha ka sngi Palei bad ki pulit ki don ia ka jingthmu ban pan por shuh shuh ban pynlong jingtohkit ia kitei kiba suba pyniap ia u Raja Raghuvanshi. Ha kane ka jingleit sa Sohra ki pulit ki la pynjur pahara bad iada ia kine ki suba nongpyniap briew bad ka SIT ka la mad ruh ia ki jingeh ban tohkit namar ka jingjaw slap bad ka jingdum lyoh ha katei ka jaka.

Leave a Reply

Your email address will not be published. Required fields are marked *