Shlei um ka skul St. Jude bad ki iing briew ha Ampher-Byrnihat

Ka skul, ki iing ki sem bad ki lynti ki synkien ki la shah ktah jur na ka daw ka jingshlei um ha ka Shnong Ampher, Byrnihat ha Ri Bhoi District. Kane ka jingshlei um ka la jia na ka daw ka jingiai bteng ka jingther u lapbah kaba la neh naduh hynnin ka miet bad haduh mynta ka step sngi Hatmaji. Ka skul kaba la shah ktah ka dei ka St. Jude Higher Secondary School kaba don ha Byrnihat, ha kaba ka um ka la rung wat sha ki kamra klas bad sha ki iing ki sem.

Kane ka jingjia ka dei kaba la ju jia man la u snem tang shu poi ka aiom lyiur ba jur slap, ha kaba mynta ka sngi, katei ka skul pule ka la hap ban ai shuti ia ki khynnah skul, na kadaw ba ka um ka la rung shaduh ki kamram klas bad ki phyllaw jong ka skul. Kumba shu pynpaw, kane ka jingjia shlei um ka ju jia na ka por sha ka por tang shu jur u slap bad ka daw kaba ki ju pynpaw, ka dei hi na ka jingbym biang ka Nala um jong ka surokbah National Highway-6 ha Ri Bhoi District.

Kum ban pynkynmaw, u MLA ka Jirang Constituency u Bah Sosthenes Sohtun ha u snem ba la dep u la ai ruh ki lad jingiarap sha katei ka skul bad ban iarap ruh ban pynkhuid ia ka nala um, hynrei mynta u snem kane ka jingjia ka jia biang kumjuh ha kaba ka la buh jingeh ia ki bor pyniaid skul bad ruh ia ka shnong ba ka jingshlei um ka jia beit ha kane ka shnong.