Shna ka ‘Rehabilitation Centre’ ha jaka ka ktem CRPF Mawlai: SSMP

Ka Seng Samla Mawlai Pyllun (SSMP) ka la ai jingmut ia u Director ka DREAM project ban iakren bad ka Sorkar Jylla ban tei noh da ka jaka sumar (Rehabilitation Centre) ha ka jaka ba don ka ktem CRPF ha Mawlai.

Ia kane ka SSMP ka la pynsngew ha ka jingialang bad u Director ka DREAM project u Bah Francis Kharshing bad ki Seng Samla Shnong bapher bapher ka nongbah Shillong.

Haba kren sha ki lad pathai khubor u president ka SSMP u Bah Samuel Biam ula ong, ba baroh ki tip ba ki jaka sumar droks (Rehabilitation Centre) riewshimet hapoh ka Jylla ki shim rem ka dor ban sumar ia kiba kyrni drok bad kane ka buh jingeh bha ia ki longiing baduk ban leit shah sumar ia ki khun ba kyrni drok.

U Bah Samuel ula ong, ki nongshong shnong ka Mawlai naduh ki snem ba la dep ki la dawa na ka Sorkar ban pynkynriah noh ia ka ktem CRPF sha kawei pat hynrei haduh mynta, kane ka jingdawa kam pat urlong.

“Ngi ai jingmut ha u Director ka DREAM ba tei noh ka jaka sumar (Rehabilitation Centre) ha kane ka jaka ba don ka ktem CRPF, namar kane kan long ka jingkyrkhu ia ki paidbah khamtam na ki longïing ba duk ba phah sumar ia la ki khun kiba la kyrni drok” la ong u Bah Samuel bad bynrap ki longïing ba don ki khun ba kyrni drok ki ju pynsngew ia ki jingjynjar ban phah sumar sha ki Rehabilitation Centre ba pynïaid da ki riew shimet ba rem ka palat ka bai sumar.

Ula ïathuh ha ka jingïalang ki ophisar ka DREAM ruh ki la pynnsngew ba ka don la lad ban map ne pynduna ia ka dor bai phah sumar ïa kito ki samla ba la kyrni drok.