Shong bos lang u CM, Speaker, LoP, Myntri bad ki MLA

U Myntri Rangbah ka Jylla u Conrad K. Sangma hynne ka sngi, ula pyllait paidbah ia ki 84 tylli ki bos thymmai kiba kynthup ia 55 tylli ki bos elektrik lyngba ka PM eBus Sewa Scheme, ha ka jingialang kaba la long ha Meghalaya Legislative Assembly bathymmai ka jylla kaba don ha Mawdiangdiang, New Shillong Township.

Kane ka jingpyllait paidbah kadei ruh ka jingsdang pyntreikam ia “Ka Bos Jong Ngi” hapoh jong ka Tnad Urban Affairs bad kine ki bos bathymmai ki don ia ki Air-Conditioning (AC), jaka ban Charge ia ki mobile phone, ka Real Time Tracking System bad ka e-ticketing ban pynthikna ia ka jingsuk, jingshngain bad ka jingbit jingbiang jong ki nongshong bos.

Hynne ka sngi, la sdang ruh ia ka jingpyniaid ia kine ki bos na IIM Shillong sha Upper Shillong bad kane ka jingshakri kan long man la ka sngi naduh ka por 7 baje mynstep haduh 9 baje mynmiet.

Kane ka jingthmu kadei kaba la khmih lynti ban pynbha iaka leit ka wan bad ban pynbiang ia ki nongshong shnong ia ka jingshaniah, ka jingsuk ne jingaram bad kaba iadei bad ka mariang ha ka leit ka wan ka jongki paitbah.

Ha kane ka sngi, u Conrad Sangma ula aiti ia ki 7 tylli ki ‘Food Cart’ lyngba ka Van Dhan Vikas Kendra (VDVK), sha ki nongioh jingmyntoi kum ka jingkyrshan ia ka kamai kajih ka jongki bad ia ka jingsengkam ha ki shnong ki thaw.

Hashwa kane, u Myntri Rangbah ka jylla u Conrad K Sangma, u Lamphang ka ïingdorbar thawaiñ u Thomas A Sangma, u Nongialam ka Liang Pyrshah ha ka ïingdorbar u Dr Mukul Sangma, ki myntri sorkar bad ki MLA kila shong da ka bos na Assembly kaba don ha Rilbong bad kila leit sha ïingdorbar thawaiñ kaba don ha Mawdiangdiang ban peit ia ka jingpyniaid shakhmat ia ki kam bad ia ki jingtrei bapher ha kane ka thaiñ.