Shongkun ka rakhe kut snem ka Seng Khasi, shim bynta da ki hajar ha lympung Weiking

Ka Seng Khasi Seng Kmie hynne ka sngi ka la rakhe ia ka Seng Kut Snem kaba 125 bad kane ka jingrakhe ba shisien shi snem ka la long kaba shongkun ia kaba la wan ban iashim bynta da ki hajar ngut ki paidbah na kylleng ka rilum Khasi-Jaintia ha lympung Weiking Jaiaw. La sdang ia kane ka jingrakhe da ka jingialum lang ha Madan Iewrynghep, ha kaba la ioh ia ka nguh ka dem na u bah KS Marbaniang uba long u President ka Seng Khasi Nongthymmai Madanryting Pyllun bad hadien ka nguh ka dem la pynbud ia ka shad ka mastieh bad la sdang ia ka jingiaid pyni riti na katei ka madan ban leit sha lympung Weiking ia kaba la iashimbynta da ki hajar bad la pyniphuh iphieng ia kane, da ka jingpyni ia ki tabut ne Tableau kiba la shna kyrpang ha ki rukom ki bapher bapher.

Yn da la poi haka iing seng kaba don ha Mawkhar la pynher ia ka lama jong ka Seng Khasi bad la pynlong ia ka nguh ka dem bad hadien kane la bteng biang iaka jingiaid kjat na Mawkhar sha Lympung Weiking bad ynda la poi ha Lympung Weiking la ioh ia ka jingkren na u President Seng Khasi Kmie u rangbah Oplysor Pyngrope bad la ioh iaka nguh ka dem na ki kynhun ki san ka Seng Khasi Kmie, ki jingrwai bad ki jingkren na ki nongialam ka Seng Khasi Kmie. U Bah B.K. Dey Sawain uba long u Nongaibuit ka Seng Khasi Kmie ula pyllait paidbah ia ki prokram jingrakhe ia ka jingdap 125 snem ka Seng Khasi bad kane ka jingrakhe kan sdang naduh kane ka sngi ban kan kut haduh u snem ban wan.

Ka jingrakhe ia ka Seng Kut Snem ka long kum ka jingkynmaw burom ia ki 16 ngut ki rangbah mynshwa kiba la ïeng ban iada iala ka jong ka Jaidbynriew na ki tyrsim ka jingma jong ka ‘eriong ‘erngit kaba la wan ban beh kyrthep bad sdang ruh ban rah ban rong noh wat ia ki tynrai jong ka Jaidbynriew.  Dei ha ka 23 tarik u Naiwieng, ba ka Jaidbynriew ka la sei ia ki rangkynsai ki rangdajied ban iada na ka jingwan tyllep u lyoh ba dum bad dei kine ki rangbah kiba pynkhie im bad pynkyndit bynriew ia u Khasi lyngba ka bor pyrkhat bad jingiohi jngai jongki ban ialeh pyrshah ia ka jingthombor u nongwei nongar, ban pynduh pyndam ia ka jingngeit niam, ngeit rukom bad iaka riti dustur u Khasi.