Shongshit ka pynkhuid Shnong ha Nongpoh, pyllait u MLA ïa ka song ba 15 lak tyngka

Kumba ju long man ka snem, ki paidbah nongshong shnong ka sor Nongpoh ki la mih ryntieh biang ban pynkhuid ia ka shnong ka thaw baroh kawei ban wanrah ia ka jingkhuid jingsuba bad kaba la nang ai mynsiem ruh ha kane ka sngi ka la long ba u MLA ka Nongpoh Konstituensi u la aiti ruh ia ka song pisa kaba 15 lak tyngka ban tei pynbit pynbiang ia ki Iingdorbar jong ka Dorbar Shnong Nongpoh. Hashwa ban sdang ka jingmih pynkhuid shnong, la pynlong ia ka jingialang paidbah ha kaba la wan ban ia donlang da u Bah Mayral Born Syiem, MLA ka Nongpoh Konstituensi, u Bah Balajied Rani, MDC, u Bah Sylvester Mynsong, Rangbah Shnong ka Nongpoh bad u Samla Anthony Suchiang, Secretary nalor kiwei kiwei ki riew rangbah ka shnong.

Haba ai jingkren ha kane ka sngi, u Bah Mayral Born Syiem, u la ai khublei kyrpang ia baroh ki nongshong shnong ka sor Nongpoh kiba la kloi ban mih ryntieh ban shimbynta ha ka jingpynkhuid shnong ban wanrah bad ban pynneh pynsah ia ka khuid ka suba hapoh ka Shnong ka thaw hi baroh kawei, da kaba kdew ruh ba ka jingkhuid jingsuba ka wanrah ia ka jingitynnad ymtang ia ka shnong ka thaw hynrei wat ia ka jingmut jingpyrkhat bad ka Koit ka Khiah ki para briew hapoh ka shnong ka thaw hi baroh kawei. “Ban pynneh ia jingkhuid jingsuba hapoh ka shnong ka thaw ka dei ban long ka jingkitkhlieh lang jong baroh ki nongshong shnong ba kynthup naduh ki trai shnong, ki nongshong wai bad kiwei kiwei, ym ban shu shaniah tang ha ki katto katne ngut kumno phin sngew haba ki kyrpong iing jong phi kin don hapdeng ka jingjyllei jong ki jakhlia bad jaboh jabain”, ong u Bah Mayral haba khot kyntu ia baroh ban snohkti lang ban wanrah ia ka jingkhuid jingsuba kaba man ka sngi ha sor Nongpoh kaba dei ruh ka sor bah jong ka Ri Bhoi District.

Kaba la pynkmen bad ai mynsiem ia ki nongshong shnong ka Nongpoh Proper, ka la long hadien ba u MLA ka Nongpoh Konstituensi u la ioh ban aiti ia ka mang pisa kaba 15 lak tyngka ban tei pynbit pynbiang ia ka Iingdorbar bad ruh ban kular na ka bynta ban pynbit pynbiang sa ia ka madan ialehkai basketball.