Shwa ban khlad duwai ka samla ba u Blei un map ïa u samla ba ot pdot

Ka samla Phyrnailin Kharsyntiew katba ka dang don ha kali ha lynti ban leit sha Tirot Sing Memorial Civil Hospital Mairang naka jingmynsaw haka jingshah ot pdot ha u samla baka pan ïakhlad, kala duwai ba u Blei un map ïa u halor kaei kaba u la leh ïaka bad kala duwai ruh naka bynta ïalade bad haba la poi ha Hospital kala khlad noh. Ïa kane la ïathuh da kiba ha ïing jong ka Samla Phyrnailin Kharsyntiew bad la kren ruh da u hynmen jong ka, haka jingïalang leh burom khatduh ïaka met ba dangsah jong ka shwa ban rah sha u Lumjingtep. Hapdeng jong ka jingsngewsihktang kiba ha ïing hasem bad ki lok ki jor, ka standing choir Jingïaseng Samla Wahrit District kala ïeng ban ai khublei khatduh ïaka Samla Phyrnailin daka sur jingrwai ka ba ong ‘Ngi sngewbynnud’.

Shuh shuh katkum ka history lyngkot bala pynsngew ha kane ka sngi lehburom khatduh ïaka, la iathuh ba nalor ba ka dei ka Dkhot jong ka Standing Choir ka Jingïaseng Samla Wahrit District, ka samla Phyrnailin kadei ruh kaba ïakit ïabah shitrhem ïaki kam balang naduh ka jingïaseng khynnah, jingïaseng Samla bad jingïaseng kynthei bad kala long ruh ka nongialam jingrwai haka balang nalor kiwei kiwei ki kam, kaba la pynsahnud ïa kiba bun ba lang ban duh noh ïaka tang shiteng por.

Ha kane ka sngi ka 2 tarik u naitung 2025 kaba dei ka sngi leit ontep ïa ka samla Phyrnailin Kharsyntiew, nalor kiba ha ïing ha sem, ki lok ki jor la sakhi ruh ïa ka jingïadonlang ka kong Ampareen Lyngdoh, ka myntri ba dei khmih ïaka tnat ka koit ka khiah ka sorkar jylla, u MDC ka Pariong Mawthadraishan u bah Powel Sohkhlet, ka seng Khasi Student Union Nongkhaw Circle nalor kiwei kiwei kiba la wan sngewlem.