Sngewkhia ka HYC ba suki ka rukom pyntrei ia ka madan Artificial Turf ha Riangdo

Ka HYC Riangdo Unit, hapoh ka jingïalam u samla Banteilang Hoojon, mynta ka sngi ka la leit ban jurip ïa ka madan ïalehkai phutbol Artificial Turf ha Riangdo, West Khasi Hills, bad ka la pynpaw ïa ka jingsngewkhia halor ka jingsuki palat ban pyndep ïa kane ka project.

Ïa u mawnongrim jong kane ka madan la buh ha ka 2 tarik Rymphang 2024 da u Myntri ka tnat Sports, Bah Shakliar Warjri, ha ka jingïadonlang u MLA ka thaiñ, Bah Methodius Dkhar bad katkum ka jingiathuh ki nongialam ka HYC, na ka liang u Myntri Rangbah ka Jylla, u Conrad K. Sangma, u la kular ba yn pyndep ïa kane ka projek hapoh 18 bnai. Hynrei, watla la jan dap lai snem naduh ba la buh ïa u mawnongrim, kane ka project ka dang sah khlem pyndep, ha kaba ia ka jingpyntrei dang lah ban pyndep tang kumba 50 percent ei ei.

Ki la pynpaw ba shwa ban sdang ïa kane ka jingpyntrei, kane ka madan ka la long kawei na ki jaka ba kongsan ban pynlong ïa ki lympung ïalehkai phutbol bapher bapher, kynthup ïa ki lympung jong ka Mawshynrut Sports Association (MSA), naduh First Division, Second Division, Third Division haduh Super Division. Kine ki lympung ki la khring ïa ki kynhun ïalehkai bad ki paidbah kiba ieid ïa ka phutbol na kylleng ka thaiñ. La khmih lynti ba kane ka project kan ai jingmyntoi shibun ïa ki khun samla bad kan kyntiew ïa ka kam ïalehkai phutbol ha ka thaiñ.

Namarkata, ka HYC Riangdo Unit ka kyntu jur ïa u contractor, u MLA ka thaiñ bad ka Sorkar Jylla ba kin shimkhia mardor ban pynsted ïa ka jingpyntrei bad pyndep noh ïa kane ka madan khlem ha ka por ba biang. Ka seng ka pynpaw ïa ka jingkyrmen ba hapoh u snem ban wan, kane ka madan kan dep noh khnang ba ki khun samla kin lah ban pyndonkam noh ïa ka.

Ka FKJGP ka maham ruh ba lada dang pynslem, ka seng kan hap ban shim ïa kiwei pat ki sienjam ban pynbor ïa kiba don bynta ba kin pyndep noh ïa kane ka project na ka bynta ka jingmyntoi jong ki paidbah bad ki khun samla jong ka thaiñ.

Leave a Reply

Your email address will not be published. Required fields are marked *