Soi MoU ka JHADC bad ka Earthtree ban pynjyrngam ia ki jaka ba syllen

Ka Jaiñtia Hills Autonomous District Council lyngba ka tnat forest hynne ka sngi kala iasoi MOU bad ka Company Earthtree halor ka thong ban iatreilang naka bynta ban pynjyrngam ia ki jaka lum ba syllen kiba dei trai da ka JHADC bad kane ka jingiasoi kan neh haduh kumba 40 snem.

Ha ka jingialang iasoi MOU ba pyniaid da u Dr H.H.Mohrmen consultant Earthtree ha conference hall ka JHADC bala donlang u F.W. Blah Chief Forest Officer ka JHADC, u Sunny Donkupar Mawiong Director Earthtree u ong kane ka project kam mut tang ban shu thung dieng hynrei ban sumar sukher ruh ia ki bad ban ialeh kumno ban wanrah biang iaka jinglong jingman ka mariang kum ha ki por mynshwa, namar ba la iohi ha kine ki sngi ka Jylla jong ngi ka la mad ia ka jingduna slap, jingring swai ki um ki wah bad kylla ka jinglong ka suiñ bneng ka daw dei ba la duna ki dieng ki seij.

U ong ruh ba kin iatreilang bad ki shong ki thaw, ki seng kur bad ki riew shimet naka bynta ban jyrngam iaki jaka lum jong ki kiba syllen bad sah shrah. U F.W. Blah CFO JHADC haba kren u pynpaw ka jingsngewnguh ia ka executive committee ka JHADC kaba la pdiang sngewbha ia kane ka project namar katkum ka jingiohi jong u ym tang ba kan wanrah ka jingmyntoi ia ka Council hynrei ia ka mariang kumjuh. La ioh ruh ka jingkren na u Dr S.N Gosawami, Chief Operating Officer Earthtree. Haba ia dei bad kane ka jingsoi MOU la ioh ruh ban ia kren bad u CEM ka JHADC u Thombor Shiwat uba la pynpaw ka jingkyrmen ba kane ka project kan long kaba jop bad wanrah jingmyntoi.