Syrtap ki pulit ha Rani Jirang Pulom ka jingplie ophis u Lyngdoh Sohiong ha Rani Jirang, shah kem uwei

Ka jingthmu jong u Lyngdoh Hima Sohiong ban plie ia ka ophis treikam ha Rani Jirang, Ri Bhoi District ka la pulom hynne ka sngi, hadien ba u Deputy Commisioner, Ri Bhoi ula pynjari ia ka kyndonain 144 BNS ban khang pyrshah ban ialum paidbah ioh ka mih kino kino ki jingjia ba sngewsih. Ka khubor ka iathuh u Syiem Hima Jirang ryngkat ki myntri ki longsan bad ki riew rangbah ka Hima ki la hiar paidbah sha Rani Jirang ban khang pyrshah ia katei ka jingthmu u Lyngdoh Sohiong ban plie ia ka ophis ha Rani Jirang, da ka jingthmu ban kam trai ia ki jaka jong ka Hima Jirang lyngba ka shnat hima Nongwah. Hynrei hadien ki la ioh ba la syrtap da ki pulit ha Rani ryngkat ki paidbah ka hima u Lyngdoh hima Sohiong ryngkat ki briew jong u ki sangeh ban leit sha Rani Jirang ban plie ophis treikam.

Na ka liang u Syiem Hima Jirang ryngkat ki nongialam ki la ap hynne ka sngi naduh 9 haduh 12 banje shiteng, hynrei ki briew ka lyngdoh Sohiong kim shym wan bad kynnoh ba ki la leit phai kylla ba syrtap ki pulit bad ki paidbah ha Rani Jirang.La iathuh ki paidbah ka hima jirang hadien ki la leit phai noh sha la shnong, namar ki sngewthuh kitei ki briew na ka hima sohiang kim nud pynibor bad ki la phet krad na katei ka jaka.U Paiem RH Wahlang ka Hima Jirang, ula ong kane ka jingleh ka dei ka jingthombor ia ki paidbah ka hima Jirang kaba la don mynta sa ki spah snem ha ka jingsynshar khaddar kaba iaid beit, hynrei mynta ki mut ba wan kam ia ka hima Jirang lyngba kata ka shnat Nongwah Mawtamur kaba long pyrshah ia ka riti synshar bad ki bor ka District Council ki dei ban pynlong ka jingjurip halor kane jingjia.

Kumjuh u Secretary ka hima Jirang u Bah S Wahlang ula pynpaw ka jingpyrshah jur ia ka jingleh u lyngdoh Sohiong ban shu wan kam ia ki jaka ka hima jirang bad kyntu ba ki dei ban pule kot bha shwa ban wan ha Rani Jirang, ban lait shah khlem rain ha ka synshar khaddar. Ha kajuh ka por, la iathuh uwei u rangbah na shnong Amring ula shah kem ha ki battalion ka Assam hynne ka sngi ha shnong Umshalani, ha ka jaka ba la pynkhreh bam ia ki briew ka hima sohiong kata hadien ba la plie ia ka ophis treikam ha Rani Jirang hynrei ka la pulom noh noh.Haba pyrshang ban wad jingtip halor katei ka jingjia shah kem u rangbah ym shym la ioh jingtip satia haduh ba thoh ia ka khubor.