T.1 Lak noh synniang u Bah Sanbor ia ka Ferrando Transit Home

U Myntri ka Sorkar Jylla u Bah Sanbor Shullai uba long ruh u MLA ka South Shillong Constituency hynne ka sngi ula ai jingiarap T.1 Lak ia ka Ferrando Transit Home cum Children Orphanage Home kaba don ha Mawlai Mawdatbaki, Shillong. U Bah Sanbor Shullai ula aiti ia katei ka song tyngka kum ka dak ban kyrshan ia kane ka jaka kaba la trei borbah bad ban noh synniang lyngba ki kam ki jongka, ha ka jingrakhe lypa ia ka jingpdiang sngewbha ia ka Khristmas bad ia u Snem Thymmai, ha ka jingialang kaba la pynlong ha katei ka Transit bad Shelter Home kaba ri bad sumar ia ki 87 ngut ki khynnah.

Haba kren ha kane ka jingialang, u Bah Sanbor ula ai ka jingiaroh ia baroh ki dkhot bad ki nongtrei jong kane ka Shelter Home, kiba la pynlong ia katei ka jingrakhe bad pynpaw ia ka jingkmen ban ioh ban iadonbynta lang ha kane ka khyllipmat jong ka jingialehkmen bad jingialeh sngewbha. U Bah Sanbor ula ong ruh ba katkum ki jinghiaki na ki ktien bakhuid, ba baroh ki jait jingthaw kiba im ha kane ka pyrthei, la kidei ki mrad, ki sim, ki dohkha ne ki khniang kidei kiba la thaw hi da u Blei bad kumba ka ktien bakhuid ka ong,“Ka jingshakri ia ki briew kadei ka jingshakri ia u Blei”.

Ha shwa kane, ka Sister Dalina Francis G kala pdiang sngewbha ia baroh kiba la wan sha kane ka jingrakhe katba ka Naphi Laso, Deputy Chief Legal Aids Reform Council kala ai jingkren bad la pyniaid ia ka jingialang da ka Anchal Gurung. Ha kane ka sngi la ioh ruh ia ka jingpyninam na ki khynnah, kynthup ka jingrwai ia ki jingrwai Khristmas, ka jingak ia ka drama lyngkot ha kaba ia dei bad ka jingkha ia u trai Jisu Khrist bad kiwei kiwei ki jingiakob bad la pynkut pat da kaba ia buh jingduwai kyrpang.