T.100 Klur pan jingïarap u MR ban pynlong National Games ha Meghalaya

U Myntri Rangbah ka Jylla u Conrad K Sangma hynne ka sngi ula aiti ia ka dorkhas ha u Myntri Rangbahduh ka ri u Narendra Modi bad kyrpad ban kyrshan da ka song tyngka kaba T.100 Klur ia ka Meghalaya na ka bynta ban pynlong ia ka lympung iakob ialehkai kaba heh tam ha ka ri ka 39th National Games ha u snem 2027.

U Conrad K Sangma ula kyrpad ban ai T.100 Klur kum ka jingai jingiarap pisa na ka Ministry of Youth Affairs and Sports jong ka Sorkar India, ban pynkhreh ia ki rynsan iakob ialehkai, ka jingpyniaid bad ka jingiatreilang hapdeng ki jylla bapher namar ka jingheh jong kane ka lympung ialehkai, ka jingpyniar ia ka jingkitkhlieh ha ka thain ban pynlong ia kane ka lympung iakob ialehkai.

Ula ai jingmut da kaba ong, “Ka Jylla ka tyrwa ia ka jingsdang kaba tang shisien, ka jingai ia ka jingiarap da ka song tyngka ia ka Jylla kaba pynlong ia ka National Games kaban sdang pyntreikam naduh ka jingpynlong ia ka 39th National Games, ban plie lad ban don ia ka rukom pynwandur kaba paka, ka jingpyntreikam ha ka por kaba la buh bad ban thaw ia ka jingsahnam khamtam haba katto katne tylli ki jingiakob ialehkai jong ka 39th National Games yn pynlong ruh da ki Jylla jong ka thain shatei lammihngi ka ri.

Ula ong, ba ka Meghalaya kan bei ia baroh ki jingpynlut pynsep kaba kynthup naduh ka jingsah, ka jingpynbiang ia ka bam, ka leit ka wan, ka jingpynlong ia ki jingiakob, ka jingpynbna nam, ka jingpynkhreh ia ki jaka ialehkai ha kylleng ki jaka ialehkai bad ka jinglut jingsep baroh jong katei ka lympung iakob ialehkai kan kot kumba T.400 Klur.

U Conrad ula pyntip ba ka Jylla kala kynshew pisa kumba T.1,000 Klur naduh ba la iasoi ia ka Kontrak kum ka jylla ban pynlong ia katei ka lympung ialehkai, ban thaw ne shna ia palat 200 tylli tam ki jingdonkam ia ki jaka ha ki shnong ki thaw bad ha ki kyrdan kiba kyrpang bad kala buh ruh ia ka jingkular sa T. 1,900 Klur na ka bynta ki 3 snem kiban sa wan, kumta hapoh u snem 2028, ka Jylla kan don haduh 500 tylli tam ki jingtei bad ki jaka ialehkai ha kylleng ki block, district kaban kynthup ruh ia ka Football Stadium kaba heh tam ha ka ri, ka First Natural Slalom Course ka jaka ia kinglieng ha ka Wah kaba dei kaba nyngkong eh bad ka Aquatics.