T.106 klur tyrwa ka sorkar na ka CPPP, donkam iatreilang ki Society, SHG bad ki riew shimet

U Myntri Rangbah ka Jylla Conrad K Sangma hynne ka sngi, ula pyllait ia ka Community Public Priate Partnership Programme (CPPP) ban ai jingmyntoi ia ki Processing Unit ba heh ha jylla Meghalaya. Ha kane ka jingplie la iadonlang ka Myntri ka Koit ka Khiah ka Kong Ampareen Lyngdoh, ki heh ophisar sorkar bad kiwei kiwei. Haba kren ha ka jingialang, u Myntri Rangbah Conrad K Sangma ula ban jur ba ka jingplie ia kane ka prokram ka dei ka sienjam ban kyntiew bad wanrah ia ka jingkylla ha ka rukom im jong ki nongrep ha ka jylla bad ban thaw ia ki lad ban ai kam ai jam bad ula pynpaw ia ka jingdonkam ban don ka jingiatreilang hapdeng ki kynhun bapher bapher kiba kynthup ia ki Co-operative Society, ki Self Help Group bad ki riew shimet, ban kyntiew ia ka jingpynmih ia ki marrep bad ban kyntiew ia ka ioh ka kot”. Ula ong, “Haba ngi iakren shaphang kiba donbynta lang ha ka kam, la kidei ki kynthei jongka jylla bad ki mat bapher bapher kiba iadei bad ka koit ka khiah ne ki samla jong ka jylla bad ki mat bapher naduh ka pule puthi bad ka jingailad ia ki ha ka kam ialehkai, ka tem ka put, ne la kadei ia ki nongrep, ngi la sngewthuh ba ka don shibun ka lad ban kyntiew ia baroh kiba donbynta lang bad ki kynhun bapher kiba don ha ka jylla bad nalor ki skhim kiba la don lypa na ka Sorkar India bad katto katne ki skhim na ka Sorkar Jylla, kim shym la don pat kino kino ki prokram, polisi treikam ne ki buit treikam ban btin lynti ia ki ban iaid shakhmat”.

Ula kren ruh halor ki jingthmu jong ka sorkar ban pynbeit ryntih ha ka rukom kaba dei bad ban pyniasoh ia ki nongshimbynta bapher bapher ha ka kam rep ban pynbha ia ka jingtreikam bad ki jingmih jong ki.  “Kam dei ba ngi hap ban leh bun ki kam kiba khraw ban pynbha ïa ka jingpynmih baroh kawei bad ïa ka jingbha bad ban pynkiew dor ïa kitei ki jingmih. Kumta, kane ka rukom ban sngewthuh, ba ngi donkam ban lumlang bad pynïasoh lang ïa baroh ki nongrep” la ong u Conrad. Ula pyntip ruh shaphang ki Integrated Village Co-operative Society (IVCS) bad ki Producer Groups ne ka kynhun jong ki nongpynmih ba kila ioh jingmyntoi bha ha kine ki snem kiba la leit lyngba ka jingshimkhia ka sorkar jylla bad ula ong ba ka jylla kam don satia iaka lad ban pynmih kham bun shuh shuh ia ki mar ki mata katkum ka jingdawa ha ka iew, hynrei ka donkam ban iaid da kawei pat ka rukom ha ki jingpynmih kiba kyrpang kum  u sying, shynrai, tit shitake bad kiwei kiwei.

Ula pynpaw ia ka jingsngewhun halor ka jingiaid ki kam na ka bynta ban kyntiew ia ka rukom im jong ki nongrep bad ki cooperative society hynrei ula banjur ia ka jingdonkam ban iai pyrshang ban kyntiew shuh shuh ia ka rep ka riang bad ki processing unit.  Ka Sorkar Jylla ka la tyrwa ban bei T.106 klur lyngba ka CPPP ha ka jylla Meghalaya. U Myntri Rangbah ula aiti ruh ia ka cheque kaba kot T.16 klur na ka bynta ka CPPP prokram bad T.2.55 klur kum ka bai seng ia ki Cooperative bapher bad ula pyllait ruh ia ki Agri Response Vehicle lyngba ka CM Elevate.