T.1400 klur mang ka sorkar ban pynkylla dur ia ka sor Tura

Ban kyntiew ia ka jingbit jingbiang bad pynsuk ia ki paidbah ryngkat ban pynitynnad ia ka shnong, u Myntri Rangbah ka Jylla u Conrad K Sangma hynne ka sngi, ula plie ia ka Paver Block Road ha ka shnong Lower Hawakhana, Tura. Ia kane ka projek la shna hapoh ka jingbhah tyngka jong ka Smart Town Project. Haba kren ha ka jingialang ba la pynlong da ka Development Committee ka Lower Hawakhana, Tura, u Conrad Sangma ula ong ba ula ioh bun sien ban jngoh ia ka shnong Lower Hawakhana haba u leit ban ialap elekshon bad mynta u dap da ka jingkmen ban iohi ia ka jingkylla ha kane ka shnong. Ula ong, watla katei ka dei kaba rit, hynrei kadei pat ka skhim kaba kongsan kaba la wanrah ia ka jingkylla kaba khraw ha ka shnong bad ka iathuh ba ia ka Paver Block Roads la bhah lyngba ka Smart Town Project ban pyntreikam ha kiba bun tylli ki shnong hapoh ka sor Tura.

U Conrad ula pyntip kumba T.54 klur hapoh jong ka Smart Town Project la dep ban bhah na ka bynta ki Block Road ha kylleng ki shnong hapoh Tura bad ula ong ba la mang sa T.1400 Klur na ka bynta ki projek ki bapher bapher hapoh ka sor Tura bad u dap da ka jingkmen ban iohi ia ka jingkylla hapoh ka sor Tura mynta. U la pyntip ruh, ba ka sorkar ka dang trei bad ialeh ban wanrah ia ka roi ka par kaba ryntih ha kylleng jong ki District Headquarter bad ban kyntiew ia ka roi ka par ha ki shnong ki thaw.

U Myntri Rangbah ula iakren ruh bad ki nongshong shnong, ha kaba ki la pynsngew ia ka jingdonkam ban buh ia ki painkhana paidbah, ki Street Light, CCTV bad kiwei bad ka la don ruh ka jingpynsngew ka Development Committee ka Lower Hawakhana ha kaba ia dei bad ka jingdonkam ban don ia ka surok ka ban poi sha u Lum Jingtep bad ban tei ia ka kynroh maw na ka bynta ka iingmane kaba don ha katei ka shnong bad na ka liang u Conrad Sagma ula pytnhikna ba yn sa shimkhia halor kitei ki mat.