T.2.98 klur ia ka PHC, T.4.73 klur ka Stadium ha Mangsang

U Myntri Rangbah ka Jylla u Conrad K. Sangma hynne ka sngi, ula buh mawnongrim ban tei ia ka Mini Stadium bad ban shna pynbha ia ka Mangsang Primary Health Centre (PHC) ha East Garo Hills.

Ia ka projek la mang T.4.73 klur ban shna ia ka Mini Stadium da ka Tnad Sports and Youth Affairs bad yn kyntiew ia ka jaka ialehkai ba don lypa ba la tei da u (L) PA Sangma, katba ia ka jingshna pynbha ia ka Mangsang PHC ka jinglut kan kot T.2.98 klur.

Ha kane ka prokram la shim bynta u Jim M. Sangma, ki heh ophisar sorkar bad ki nongshong shnong.

Haba kren u Conrad Sangma ula pynkynmaw ba u don ka jingiadei la slem bha bad ka thain bad kumjuh na ka liang u (PA Sangma) nongialam ba la khlad noh ula don ka jingiadei ba iajan bha bad ka Mangsang bad u ju kren ruh shaphang kane ka shnong bad ki nongshong shnong.

Ula ong ka jingbuh ia une u mawnongrim ka iahap bad ka jingrakhe ia ka lyngkhuh sngi iap ba shiphew u PA Sangma u Lamphang barim ka Lok Sabha uba la noh synniang ia ka roi ka par ka thain.

Ula bynrap ka sorkar jylla ka buh hakhmat ban pynkhlain ia ki jaka ai jingsumar bad ula pynbna shen yn sa pyntreikam noh ia ka Fire and Emergency Services ha ka thain bad halor ka jingtyrwa ban thaw ia ka Administrative Block bathymmai un sa peit bniah.

U la pynbna ka surok Mangsang–Adokgre shen kan jam sha ka wat ba ar ban pynbha bad ban pyniasoh ia ka Shillong bad Guwahati, hynrei kumba long mynta kane ka kam ka dang don hapdeng ka jing sorjamin ia ki jaka.

U Myntri Rangbah ula kyntu ia ki samla ba ki dei ban wad ki lad ban seng kam lajong bad ban kyntiew ia ka sap ka phong bad ban jur ban pynneh ia ka jingkhuid ha ki shnong.