T.4.61 klur mang ban tei ia ka R&D Centre ha State Food Testing Laboratory Laboratory

Ka State Food Testing Laboratory hapoh ka Commissionerate of Food Safety, Meghalaya hynne ka sngi ka la pyllait paidbah ia ki ar tylli ki kor mashin ban peit bniah ia ki bam bad ki um.Ia kine ki ar tylli ki kor mashin kiba kynthup ka Automated Water Analyser bad ka GC-FID (Gas Chromatograph with Flame Ionization Detector), la plie paidbah da u Myntri ka tnad ka koit ka khiah u bah Wailadmiki Shylla hynne ka sngi ha State Food Testing laboratory, Lawmali Shillong.Kane ka Automated Water Analyser kan iarap ban eksamin kloi bad peit bniah ia ka jingshngain jong ka um kaba ki briew ki dih ha kylleng ka jylla. Katba ka GC-FIDban test ia ki phngit ba im (organic compound), kaba kynthup ia ka khlein, ka jingbang jong ka bam.Haba kren ha kane ka sngi, u Myntri ka tnad ka koit ka khiah u bah Wailadmiki Shylla ula ong ba ka jingdon jong kine ki ar tylli ki kor mashin kan nang iarap ia ka rukom treikam kaba paka ban peit bniah ia ki bam ki dih.

Ula ong ba ban wanrah ia ka rukom treikam ba biang donkam ban don ia ka laboratory ne ka jaka ban peit bniah ba biang, ki briew kiba tbit ban trei bad donkam ia ka jingiatreilang jong baroh ki nongshong shnong.U Myntri u la pynshai ruh ba ka jingpynskhem ia ka rukom peit ia ka bam ka dih ka donkam ka jingstad saian kaba thymmai ha ka rukom pynmih, ka rukom pynbit pynbiang bad ka rukom pyndonkam ia ka bam, ryngkat bad ki prokram ai jingtip ban pynshlur ia ki rukom bam kiba koit ba khiah.U bah Wailad ula ong ban tes ia ki bam, ka long kaba donkam bha ban iada ia ka koit ka khiah.Ula ban jur ruh halor ka jingdonkam ban ai ka jingpynsngewthuh paidbah halor kumno ban lehkhuid ia ka bam ka dih. “Ki briew mynta kim donkam shuh ban ap ne ban phah tes ia ki bam shabar, hynrei mynta ki la lah ban tes hi ha la ka jong ka jylla, bad kane kan iarap ban pyllait ia ki na ka jinglut phut ka pisa bad ka por ruh kumjuh,” ula ong . Ha kajuh ka por, u bah Wailad ula pyntip ba ka sorkar jylla ka la mang pisa T.4.61 klur na bynta ban tei ia ka R&D centre ha ka State Food Testing Laboratory. Katba na ka liang u Additional Chief Secretary u Sampath Kumar, ula ban jur halor ka jingdonkam ban don ia ka bam ka dih kaba bha, khnang ban lah ruh ban kyntiew ia ka marrep bad ki bam shabar ri.

Ula ong ba ka jingbit jingbiang jong ka bam ka dih ka iarap ruh ban kyntiew ia ka kam jngohkai ha ka jylla.“Ban kiew ka kam jngohkai, ka shong ruh ha ka rukom long ka bam ka dih kaba don ha ki jaka jngohkai,” ong u Sampath.Na ka liang ka Deputy Commissioner ka East Khasi Hills ka kong Rosetta M. Kurbah, ka la ong ba ka bam ka dih ka ia dei thik bad ka koit ka khiah ki paidbah. Katkum ka jingong ka kong Kurbah, ka jingdon ki briew kiba ioh pang na ka jingsniew ka bam bad ka um, ki don 53 ngut ha Puriang ha u snem 2022 bad 197 ngut ha Sohiong ha u 2023.