T.8 lak shah dain kuna ka Shakambari Ferro Alloys

Ka Dorbar Shnong jong ka shnong Rwiang, West Khasi Hills District hynne ka sngi ka la pynpaw ba ka kwah ban plie biang ia ka karkhana Shri Shakambari Ferro Alloys Pvt Ltd kaba don ha Rwiang. West Khasi Hills. Ia kane ka Dorbar Shnong jong ka shnong Rwiang, West Khasi Hills District ka la pynpaw hakhmat u Member Secretary ka Meghalaya State Pollution Control Board (MSPCB) ha ka jingialang ba la donlang ruh da u trai ka karkhana. Lah ban kdew ba haduh mynta ka karkhana Shri Shakambari Ferro Alloys Pvt Ltd ka dang don hapdeng ka jingshah khang haka Meghalaya State Pollution Control Board (MSPCB), halor ka jingpynkhein iaki kyndon ban iada iaka mei Mairang. Haba kren sha ki lad pathai khubor u Sordar ka Shnong Rwiang, u Bah Wiljou Iawphniaw ula ong ba ka rai jong ka Borad ban weng noh ia ka hukum khang tala ka dei hadien ba kane ka karkhana ka la kular ban bud ryntih ia ki kyndon ban iada ia ka mei mairang, kumjuh ruh ban pyntreikam ia ki kyndon ban nym pyllait ia ki jaboh ba mih na ka karkhana.

U Bah Wiljou u la ong ba nyngkong ka Dorbar Shnong ka sngew artatien ban shah plie biang iaka karkhana, namar ka MSPCB bad ki trai karkhana ki khlem kynjoh ktien iaka Dorbar Shnong, ha shuwa ban weng ia ka hukum khang ia ka karkhana. U la ong ba ka Dorbar Shnong ka la dawa ia ka Board ba kan pyniadon bynta lem ia ka Dorbar Shnong ha ka jingiashim rai ban pynthikna ia ka jing treikam kaba shai bad kaba khuid ba suba. Naka liang u President ka Meghalaya Commercial Truck Owners and Drivers Association (MCTODA) u Bah Mosklandar Marngar u la pyntip ba ha ka jingialang, ka Board kala pynshai ba ka rai ban weng noh ia ka hukum khang dam ka dei kaba la pynshong nongrim naka kaiphod kaba pyni ba ka karkhana kala pyntreikam ia ka jingbthah ban pynkhuid ia ki dpei (fly ash) napoh ka wah. Hynrei, ka Dorbar Shnong kala kam ba kam pat ju iohi satia ia kum kane ka kam ban leh da kane ka karkhana. U Bah Mosklandar u la iathuh ba ka Board ka la pynmih ia ka hukum khang tala ia ka karkhana ha ka 23 tarik Rymphang, 2025 hadien ba ka Dorbar Shnong ka la shim ia ka sienjam da kaba leit khang dam ia kane ka karkhana namar ka jingpynjaboh ia ka mariang.

U la iathuh ba ka kynhun ki Nongialam Shnong kala buh dak jingkylli halor ka rai jong ka Board ban pyn duna ia ka kuna na ka T.33.60 lak sha ka T.8.40 lak, haba kynnoh ba kane ka pyni ba ka kam khein snep ia ka jingkongsan ki jingim briew bad ka jingiada ia ka mariang. U Bah Mostlander ula pynpaw ruh ba ka Dorbar Shnong ka la mad ia ki jingtynjuh kiba bun ban shah plie noh ia kane ka karkhana.Haba kren sha ki nongthoh khubor, u Member Secretary ka MSPCB CH Chyrmang ula ong ba ka Board ka la khang dam ia ka karkhana la palat lai bnai. Hadien ba pynlong ia ka jingjurip, ka Task Force ka la aiti ia ka kaiphod kaba pyni ba ka karkhana ka la pyntreikam ia ki jingbthah ka Board. Kat kum ka nongrim jong ka jingbishar hok, ka Board kam lah ban iai bteng ha ka ban khang khyrdep ia ka karkhana bad kumta, ka la weng noh ia ka hukum. Ka Board ka la dain ia ka kuna na kane ka karkhana namar ka jingpynjaboh ia ka wah da kaba bret ia u fly ash. Hynrei, ka karkhana ka la kyrpad, bad u Chairman ula pynduna ia ka kuna sha ka T.8 lak, hadien ba peit ia ki kyndon ba la buh da ka Central Pollution Control Board (CPCB) bad mynjur da ka National Green Tribunal (NGT). U Bah Chyrmang ula ban jur ba ka rai jong ka Board ban weng noh ia ka hukum khang dam bad ban pynduna ia ka kuna ka dei kaba la lah kat kum ka Ain. Ula bynrap pat ba ka Board kan dang iai bteng ban peit pyrman ia ka jingpyntreikam thikna ka karkhana ia ki kyndon ia da mariang.