Tang 2500 kiba ioh kam sorkar na ki 70 hajar ki samla ha Jylla

U Myntri Rangbah ka Jylla u Conrad K Sangma hynne ka sngi ula pyntip ha ka iing dorbar ba ka jylla Meghalaya ka mad ia ka jingkyrduh kam ki samla haduh kumba 67,500 ha ka shisnem. U Conrad Sangma ula ong, kumba 70,000 ngut ki samla ki dei kiba lah ban rung kam manla u snem hynrei ki Tnad Sorkar ki lah ban aikam tang kumba 2000-2500 ngut shisnem. Ka la don ka jingduna kaba kot 67,500 ki kam ha ki tnad Sorkar, kumta ka Sorkar ka la pynkhreh ban wanrah ia ka ‘Plan’ ba pura ban iarap ia ki 70,000 ngut ki samla ki ba dei ban ioh kam.

U Myntri Rangbah ula pyntip ba ki don 7000 ki kam ba lait ha ki tnad Sorkar ia kane ka jingpynlong ia ka eksamin thungkam ka dang iaid shakhmat. Ula iathuh, ba ka Career Counselling Programme ka dei shibynta jong kane ka Plan, kaba thmu ban btin lynti bad kyrshan ia ki samla ha ki 25 jait ki kam ba kynthup ia ki kam iada ri, bank, engineering bad kiwei kiwei. U Conrad ula pynpaw ba ka Career Counselling Programme kadei kaba la pynbeit ryntih bha bad ka Meghalaya State Skill Development Society (MSSDS) kan long kum ka nodal agency bad ia kane ka prokram yn pyntreikam ha ki 34 tylli ki Counselling Centre.

Na ka liang u Nongialam ka Liang Pyrshah u Dr Mukul Sangma, ula iaroh ia ki sienjam bala shim da ka Sorkar bad ula banjur ia ka jingdonkam ban iasnohkti haba pynkhreh ia kino kino ki kam ba kyrpang, khamtam ha ki kam iada ri bad kam shipai. U Myntri Rangbah ula iathuh ba ka Sorkar Jylla kala lum thup ia ki lad iohkam iohjam ha ki liang bapher bapher kum shi bynta jong ka Vision 2030 bad la khmih lynti ba na ka kam jngohkai yn lah aikam kumba 54,000 ngut, da ka jingkhmih lynti ia ka jingnang bun ki 5 Star Hotel bad ka jingdawa kaba nang kiew ia ka jingdonkam ia ki nongniah kali bad ki nongtrei.