Tang 710 vote ioh ka BJP, hato ki paidbah kim pat pdiang ia ka Party

Lada peit ia ka jingioh vote u kyrtong ka Bharatiya Janata Party (BJP) ka kdew ba ki paidbah kim pat pdiang ia ka BJP. Ia kane la ong, da u Nongaiktien ka BJP Meghalaya u Bah M Kharkrang hadien ba u kyrtong ka BJP u Bernard N Marak u la ioh tang 710 vote ha ka ilekshon shiteng samoi ha Gambegre constituency. Haba pynpaw ka jingsngew diaw ia ka Resol, u Bah Kharkhrang ula ong “Ka la donkam ia ka BJP ban pynkylla noh ia ki buit ialap elekshon hapoh Jylla Meghalaya”. U Bah Kharkrang u la kubur ba ki don shibun ki kam kiba la iaid bakla na ka bynta ka party. Ula ong ba ka por ka la dei ia ka party ban kynthoh pyrshah ia ki jingkynnoh kam niam kaba la treikam pyrshah ia ka party ha ka por elekshon.

“Bad ka sienjam ba hap leh ka long, ngi hap ban shong bad bishar bad wad ia kaei kaba bakla bad lehse ngi lah ban pynkylla ia ki buit treikam jong ngi, kumno ngi iaid ialap ilekshon ha Meghalaya namar bun sien ha man ba don ki elekshon, ki ju mih ki jingkynnoh kam niam bad mynta ngi hap ban leh eiei pyrshah ia kane. Ngi la pyrshang ha ka elekshon 2023 hynrei nga sngew ba ki dang don shibun kiei kiei ia ngi ban hap leh” u la ong. U la ong ba ka sienjam ba ka Party ka hap shim mynta ka long ba baroh ki nongialam jong ka Party kin hap shong bad kren hok bad ban khmih bniah ia kiei ki jingduna.

“Ki don shibun ki kam ia ngi ba hap leh namar haba phi kren iano iano ruh, baroh ki mynjur ba lada ka wan ka sorkar BJP, ki kam pynroi kin wan, ka roi ka par kan don namar ki la ia bishar ba kumno ka Jylla jong ngi ka roi haba nujor bad kiwei ki Jylla. Hynrei haba poi ha ki bynta ba khatduh shuwa ka elekshon, ha shuwa ka jingiathep vote, ka ju mih ka jingkynnoh kam niam” u la ong.