Tei mot ka Dorbar Kur I’u Chak Syiem kum u Khlawait ka Raid Nongtluh

Ban kynmaw burom ia ki matti ba la len bad aiti da u riewkhraw na ka Kur Syiem u ba ka Kur ka ai nam kum u Khlawait ka Raid Nongtluh, mynta ka sngi ki nongialam ka Kur Syiem ki la tei bad plie syndon da u mot sahnam ban kynmaw ia u Chak Syiem kum u Khlawait ha ki snem 1958-59. Ia u tei u maw sahnam la plie paidbah ha ka jingialang jong ka Dorbar Kur Syiem kaba 20 kaba la pynlong ha ka ophis u Syiem ka Raid Nongtluh ha kaba la wan ban ia donlang da u Bah Mayral Born Syiem, MLA ka Nongpoh Constituency, u Pa’iem Vincent Eng Syiem, Syiem ka Raid Nongtluh, ki longsan mansan, lem bad ki longkmie longkpa lem bad ki samla jong ka kur Syiem ka Raid Nongtluh.

Ha ka jingiathuh ia ka khana shaphang u Chak Syiem u dei u khun jong ka Ngap u ba la ioh ia ka jingithuh kum u Khlawait ka Raid Nongtluh u ba la synshar ha u snem 1958 bad 1959 bad u ba la ialam ia ka kynhun ban ia khun ia ka thma pyrshah ia ki khlawait jong ka Thaiang ha ka jinghiar thma ha kitei ki snem. Haba kren ha kane ka sngi, u Bah Mayral Born Syiem, u la pynpaw ia ka jingkmen kaba khraw ban sakhi ia ka jinglong ia tylli jong ka Kur Syiem bad ban kynmaw burom ruh ia ki matti ba u Khlawait ka Raid Nongtluh u Chak Syiem u la len na bynta ban iada ia la ka ri ka Raid kaban long ruh kum ka jingpyntip ban pynneh pynsah ia ka khana jong u ne u khlawait na bynta ka pateng kaba mynta.

U la ong ruh, ba lyngba kum kane ka jingiakynduh lang kaba shisien shisnem yn lah shisha ban kyntiew ia ka jinglong ia tylli ban ia ithuh ithaw bad ban tip ia la ki para kur para jait kaba long kongsan ba kum ki khun ki pyrsa ruh kin tip kin nang ban ri ia ka akor ka burom, da kaba kitbok kitrwiang ruh ba ka jingieid iatylli kan iaineh hapdeng ki para kur ha ryngkat ka jingkoit jingkhiah bad ban nang roi ha ki por ban nang wan. Na ka liang ka Kur Syiem ha kane ka jingialang ka la ioh ban pynkup burom ia ki khun samla kiba la lah ban kyntiew ia ka nam ka burom jong ka Kur lyngba ki kam ialehkai, ka pule ka puthi bad ruh ia ka heprit na ka Kur Syiem kaba la shah jied ban mihkhmat ia ka North East United ka kynhun ialehkai football bna nam ha ka ri.