Thaw history ka phlim ‘Ha Lyngkha Bneng’ u Pradeep Kurbah

Ka phlim Khasi ‘Ha Lyngkha Bneng’ ( The Elysian Field) jong u Bah Pradip Kurbah ka la thaw ia ka histori ha ka tamasa phlim ba 24 jong ka Pune International Film Festival ha kaba ka dei tang ma ka, ka phlim na India ban don ha ka jingïakop phlim jong ka pyrthei bad ban ioh rah syndon ïa ka burom kaba ha khlieh duh ha ka histori jong ka Festival kaba la duh mynta la 24 snem.

Kane ka phlim The Elysian Field (Ha Lyngkha Bneng), kaba la direct da u Director ba pawnam jong ka ri India, u Bah Pradip Kurbah, ka la jop ïa ka khusnam jong ka Sorkar Maharashtra Sant Tukaram kum ka Best phlim ha ka pyrthei ha ka tamasa phlim kaba 24 jong ka Pune International Film Festival (PIFF).

Lah ban kdew ba kane ka phlim ka dei tang ma ka ka phlim jong ka ri India kaba la shah jied na ka bynta ka jingïakop phlim ha ka pyrthei ha kaba la don palat 900 tylli ki phlim na ki 103 tylli ki ri, ha kaba la jied tang 14 tylli ki phlim sha ka wat kaba khatduh da ka kynhun bishar jong ka pyrthei bad dei ha kane ka wat kaba khatduh, ki nongbishar ki lah jied syndon ia kane ka phlim Khasi ban ioh ia ka khusnam Best Film ha ka Pyrthei.

Ka jingjop jong ka phlim ‘Ha Lyngkha Bneng’ The Elysian Field ka pynlong ïa ka kum ka phlim India kaba nyngkong eh ban ïoh ïa ka khusnam Sant Tukaram ha ka pyrthei ha ka bynta jong ka jingïakob pyrthei naduh ba la sdang ïa kane ka tamasa ha u snem 2002.