Thep kyrteng 3 ngut ki kyrtong NPP kynthup u MLA Jirang

Ka jingthep kyrteng jong ki kyrtong na bynta ban aireng ha ka ileksion sha ka iingdorbar thawain jong ka Khasi Hills Autonomous District Council, ka la nang iaid shakhmat ha Ri Bhoi District, ha kaba la sakhi ba u MLA ka Jirang Konstituensi u Bah Sosthenes Sohtun u la pyndep ia ka jingthep kum u kyrtong ka party NPP ha ryngkat ki 2 ngut ki longkmie ba kynthup ia ka Kong Magdalene S Mawlong kaba dei ka MDC na Umsning Konstituensi bad ka Kong Rona Khymdeit na Nongpoh Konstituensi.Haba kren sha ki Nongthoh Khubor, ki kyrtong ka NPP ba kynthup ia u Bah S. Sohtun bad ka Kong Magdalyne S Mawlong, ki la pynpaw ia la ki nongrim ba kin shakri ia u paidbah lada ki paidbah ki ai ka jingkyrshan ban pynjop ia ki ban mihkhmat sha ka KHADC.

U Bah Sohtun u la pynpaw, ba kum u MLA ka Jirang u la hap ban mih hi ban iakhun kum u kyrtong MDC ka dei namar ka jingmih noh u MDC u Bah Victor Rani ban pyniasoh sha ka Congress bad kane ka la ai mynsiem shikatdei ia ka party NPP kaba la nang iohbor na ka jingwan pyniasoh jong ki nongialam ba radbah ka Congress sha ka NPP bad ka la nang pynshngain ia ka party ban ioh ia ka jingjop ha kane ka ileksion MDC ban wan. U la pynpaw ruh, ba ka thong jong u lada u jop kum u MDC ka long ban pynkhlain ia ki dorbar shnong, ki dorbar hima ban pynneh pynsah ia ki riti synshar khamtam ban iada ruh ia ka khyndew ka shyiap lyngba ki ain kiba khlain namar kumba long hi ka Jirang Konstituensi ka dei kaba don ha khappud bad ka Assam.

Ka Kong Magdalene ka la pynpaw, ba kum ka MDC hi ha ryngkat bad ka EC jong ka KHADC ki la thaw shibun ki kyndon ain kiba pynmyntoi bad iada ia ki paidbah ka jaidbynriew ha ki snem ba la leit bad ka la bynrap, ba ka kam kan kren kham jam ban ia ka ktien.