Thep kyrteng u Bah Fantin, angnud ka ktien Khasi kan dei ka Subject ha Primary School

U MDC ka Laitumkhrah-Malki constituency u Bah Fantin Joseph Lakadong u badei ruh u kyrtong ka National People’s Party (NPP) hynne ka sngi u la leit thep kyrteng ban iakhun ia ka ilekshon MDC sha ka Iingdorbar ka Khasi Hills Autonomous District Council (KHADC). U Bah Fantin uba dei ruh u Executive Member (EM) u dei uba nyngkong eh ban thep kyrteng sha ka ilekshon MDC 2025 bad ha kane ka sngi la synran lang da ka kurim bad ka Myntri Sorkar ka Kong Ampareen Lyngdoh lem bad ki nongialam bad nongkyrshan ka party. Ka jingthep kyrteng jong ki kyrtong ki ban iakhun haka ilekshon MDC kadei ha Inter-State Bus Terminus (ISBT), Mawlai Mawiong. Haba iakren shaki lad pathai khubor u Bah Fantin u la ong ba ka thong jong bad ka Party ha kane ka ilekshon MDC ba mynta kadei ban pynthikna ba ka ktien Khasi kan dei ka Subject kaba donkam haki Primary School.

U Bah Fantin u la pynpaw ba um iohi satia ia ka jingisih ia ka EC ka KHADC ka ban treikam pyrshah ia ka NPP, kaba ialam ia ka EC hapoh ka Council. “Kane ka long namar ngi la leh shibun kiei kiei hapoh ka Council. Ngi la mynjur ia bun tylli ki bill. Ngi la iatreilang bad ka Tnad DCA bad u Lat ka Jylla. Nga kwah ban ai khublei ia u Lat halor ka jingai jingmynjur ia bun tylli ki bill ba sahteng jong ngi” ula ong. Ym kum ha JHADC bad GHADC, une u EM ula ong “Haduh mynta, ha KHADC jong ngi, ka tulop ki nongtrei kam ju sahteng satia”.

Haba pynpaw ia ka jingsngewskhem ba ka NPP kan wanphai biang sha ka bor ha KHADC, u Bah Lakadong ula ong “Ngi don ka jingngeit kaba skhem ban gin thaw biang ia ka EC ba thymmai”.“Baroh ki MDC jong ngi ba mynta kila leh iala ka jong ka bynta bad kila trei shitom ba kiei kiei baroh kila iaid beit iaid ryntih. Ki ju don beit bad ki paidbah bad kumta nga ngeit skhem ba ki kyrtong jong ngi kin ioh ia ka jingjop” ula bynrap. Haba kren halor kiwei kiwei ki kam, u Bah Lakadong ula ong ba un pynthikna ba ka Ktien Khasi kan long kongsan bha ha ki jingpule jong ki kyrdan Primary.