‘Thir Bniah ïa ka Jinglong Kyrpang u Khasi ha ka Kolshor’

Ka Khasi Author Society (KAS) hynne ka sngi ka la pynlong ia ka lympung ki Nongthoh Kot Khasi (Writers Conclave). Ia kane ka Conclave la pynlong halor ka phang ‘Thir Bniah ïa ka Jinglong Kyrpang u Khasi ha ka Kolshor’ (Exploring the Cultural Identity of the Khasis). Ha kane ka sngi la don lang u Principal Secretary ka tnat Art & Culture u Bah Frederick Roy Kharkongor, ka Padmashri Awardee ka Prof Badaplin War, u President ka Khasi Author Society (KAS) u Prof DRL Nonglait, u Bah Banlam Lyngdoh lem bad kiwei ki nongkitkam ka KAS, ki samla pule bad kiwei kiwei de. Ia ka lympung ki Nongthoh Kot Khasi (Writers Conclave) la pynlong ruh kum shi bynta ban rakhe ïa ka sngi kyrpang ki Riewlum.

Haba kren ha kane ka sngi u Bah Federick Roy Kharkongor u la ong ba kane ka long kaba nyngkong ba la pynlong ia ka Janjiaya Divas 2024 kaba long shibynta bad ka program kaba ai burom ia ki riewlum. U Bah Federick u la ong ba ka jingithuh kyrpang ia ka jaitbynriew ka long ka Khyndew, ka Kyntien bad ka Tip Kur Tip Kha bad ka long ka ba donkam bah ban dang pynriewspah ia ka ktien ka thylliej, ka riti dustur  Jong ka jait bynriew. U Professor DRL Nonglait u la ong ba ka khana hiar pateng Jong ka jait bynriew Khasi kam iadei bad ka khana hiar pateng jong kiwei pat ki jaitbynriew bad ym don kiwei pat ki jaitbynriew ki ban don ia ka khana jong u Hynniewtrep hynniewskum kaba kdup lang ia u khun u ksiew u Hynniewtrep.

“Uno uno u bym don ka tynrai u Hynniewtrep yn ym lah ban kam ba u dei u Khasi, da kaba kdew ba ka jing saindur ka jinglong kyrpang ka mut ba kren halor ka jinglong shimet bad ka kynhun jaitbynriew barit ne ba heh” la on u Prof Nonglait.