Thung dieng u Lat ryngkat ki heh sorkar ha Iing Dorbar thawain

U Lat ka jylla u Chandrashekhar H Vijayashankar hynne ka sngi ula shim bynta ban thung dieng ha phyllaw ka iingdorbar bathymmai ka jylla ha Mawdiangdiang. Ha kane ka jingthung dieng la wan ban iashim bynta lang da u Myntri Rangbah ka jylla u Conrad K. Sangma, u Lamphang ka iingdorbar u Thomas A. Sangma, u Symbud Myntri Rangbah ka jylla u Bah Prestone Tynsong, u Symbud Lamphang u Timothy D Shira, ki Myntri Sorkar kynthup ia u Rakkam A Sangma, Marcuise N Marak, ka Dr M Ampareen Lyngdoh, u AT Mondal, u Opposition Chief Whip Bah Ronnie V Lyngdoh bad ki MLA na ki seng sain pyrthei bapher bapher. Ia kane ka prokram la pynlong da ka Meghalaya Legislative Assembly ryngkat ka jingiatreilang bad ka Forest Department.

U Lat ka Jylla u Chandrashekhar H Vijayashankar haba ai jingkren ula iaroh ia ka rukom pynwan dur ia kane ka iingdorbar ba thymmai bad ia ka sienjam ban thung ia ki dieng ha kane ka jaka bad ula ban jur ia ka jingkongsan ban thung dieng kiba mih na ka jylla, ki kynbat kiba la jan duh jait bad ula maham ia ka jingthung tang ia shi jait u jingthung ha kawei ka jaka namar ka lah ban ktah ia ka sawdong sawkun.U Lat ula khot ruh ia ka jylla Meghalaya kum ka “Bneng ha India,” bad ula pynkynmaw ia ka jingdon kyrpang ka jylla ia ki jingdon jingem kiba long ka spah mariang bad ban pynneh pynsah ia ki. “Ka kamram jong ngi, ka dei ban wanrah biang ia ka jinglong jingman ba bha ha ki sawdong sawkun ka mei mariang? ong u Lat bad ka kyntu ia ka jingdonkam ban iatreilang baroh.

U Lamphang ka iingdorbar ula ong, ba kane ka jingthung dieng ka long kum ka dak ka jingiatylli ban iada ia ka mariang bad ula pynbna ba ia ki dieng ba la thung da ki heh ki hain yn sa buh ryngkat ia ka kyrteng jong ki ban pyni ia ka jingkular ban pynlong ia ka Meghalaya kaba jyrngam. Katba u Myntri Rangbah ka Jylla ula ong ba kane ka jingthung dieng ka dei ban sah jingkynmaw ha ka histori bad ka jingleh kaba don jingmut, kaba iaid ryngkat bad ka jingiakhun ka pyrthei pyrshah ia ka jingkylla ka suin bneng bad ula pynkynmaw ia ka jingkren na ka phlim Gladiator: “Kaei kaba ngi leh mynta kan iai sawa shi junom” bad ula bynrap ki dieng ba thung mynta ka sngi kin ieng ban sahnam ia ki pateng ban wan.