Thung ka Iingbishar I’u ‘Special Officer’ ban peit nongdie madan ha Police Bazar

Ka iingbishar Meghalaya High Court hynne ka sngi ka la bishar ia ka jingujor Public Interest Litigation (PIL) halor ka jingshah kyndang ki nongdie madan bad ka la bthah ia ki bor ba dei peit bad ia ki pulit ba ki dei ban bud ryntih ia ki kyndon ain bad ka la thung ia u Special Officer ban peit ia kane ka kam. Ka Division Bench ka Meghalaya High Court hapoh ka jingbishar jong u Chief Justice IP Mukerji bad u Justice W Diengdoh ki la pynmih ka hukum halor katei ka jingujor PIL bad la thung ia u nongiasaid ain u Subhasis Chakrawarty kum u Special Officer ban peit ia ka jingpyntreikam katkum ki kyndon, bad la bthah ia u Special Officer ban pynkhreh ka thup kyrteng ki nongdie madan ba la ioh laisen, kiba don kumba 349 ngut ban iasyllok ryngkat bad ka Hawkers Association bad ki bor ba dei peit.

Ka iingkashari ka la pynmih hukum ba ki nongdie madan ba la ioh jingbit yn shah ban die ha thain Police Bazar na bynta katto katne kynta (12:30 mynsngi haduh 2 baje mynsngi bad 7:30 mynmiet haduh 9 baje mynmiet) bad kim dei ban shong palat ia ka por ba la buh kaba pynthud ia ka leit ka wan ki paidbah bad ki kali. Ki nongdie madan bym don laisen kim ioh shuh die jingdie ha katei ka thain. Ka iingbishar ka la bthah ruh ba u General Secretary jong ka Association u dei ban pynthikna ka por ia ki nongdie madan ryngkat ki bor ba dei peit, bad dei ban phah kynriah noh hapoh ka por ba la buh bad lada um leh hap ban kyndang noh mardor na jaka ba ki shong die jingdie.

Ka iingkashari ka la bthah ruh ia ki nongdie madan ba kin kynriah sha ki jaka kiba la pynkhreh ki bor sorkar bad kiwei ki nongdie madan ki lah ban aplai ia ki laisen ba thikna da kaba iaid katkum ka ain. La bthah ia u Special Officer ban pynthikna ba ka jingpyntreikam ia kane ka hukum kan long jai jai bad ban aiti ia ka kaiphod ha ka 5 tarik u bnai ban wan. Ka iingbishar ka la bthah ia ka sorkar jylla ban siew T.75,000 sha u Subhasis Chakrawarty uba la shah thung kum u Special Officer kum ka jingsdang ia ka kam bad dei ban siew hapoh jong ka 11 tarik u Naitung, 2025.