Thut ka rukom sam um ba bthei ki Pipe ba trei torti ka NHIDCL, kynnoh u Myntri

U Myntri ka tnat Public Health Engineering (PHE) ka Sorkar Jylla u Marcuise N Marak hynne ka sngi ula kynnoh ka jingtyrkhong um ha ki katto katne ki jaka jong sor Shillong ka dei namar ka jingpyntrei torti ka National Highways and Infrastructure Development Corporation Limited (NHIDCL) ia ka surokbah Shillong-Dawki.Ula kynnoh ba ka don ka jingbthei ki Pipe um ha ki thain 101 Upper Shillong ha ka jaka ba pyntrei ia ka surok Shillong-Dawki.Lah ban kdew palat 8 sngi ka la don ka jingtyrkhong um ha ki katto katne ki jaka ka sor Shillong khamtam ha Mawprem hadien ba la sangeh pyllait um naduh 10 tarik Nohprah.Haba kren sha ki nongpathai khubor u Marcuise ha ka jingdonlang ki ophisar ka tnat PHE, ula ong ha ka 16 tarik ula leit jurip ia ka jaka ba bthei ki Pipe um ha 101 Upper Shillong.

U Marcuise ula ïathuh ka jingtyrkhong um ka dei namar ka jingbthei ki Pipe ha ka bynta ka surok ba dang shna thymmai da ka NHIDCL. Ula ïathuh ka jaka ba bthei ki Pipe ka don hapoh ka surok ba dang dep siang rong bad ka long kaba eh ban wad ia ka jaka ba pait. “Namar kata ka tnat PHE kam don lad da kumwei pat lait noh ban pyndait thymmai noh ki pipe kaba la wanrah ka jingtyrkhong um ha kine 7 sngi ba la dep” la ong u Marcuise. U Myntri ula iathuh ka tnat ka la pyndait noh da ka Line ba thymmai ba 300 metre ka jingjrong bad la buh ruh ia ki Pipe ba thymmai.U la pyntip ka tnat ka la shimkhia ban pyndep kloi ia kane ka kam da kaba ong, “Nga sngewthuh ki paidbah ki la mad ka jingeh ba khraw. Hynrei ki ophiser ka tnad PHE bad ki nongtrei ki la trei shitom bad sah miet kumba shi taiew ban pyndep ia ka kam.

Halor ki lad jingiada hadien habud, u Marak ula ong ba ka Tnad kan kyrpad ia ka Sorkar Jylla ba kan thung ia ka jingtohkit khnang ban tynrong ia ka jingbahkhlieh bad pynkut ia kum kine ki jingjia. “Ka jingtohkit kan iarap ban tynrong ia ka jingbahkhlieh bad ban pynthikna ba kum kine ki jingjia kin ym jia shuh” ula ong. Haba iadei bad ka jingsam um, u Myntri u pyntip ba ia ka um yn sa sdang ban pynpoi sha Shillong mynta ka janmiet sngi Balang.