Tuid ki paidbah sha ka jingtep don burom ïa u Dr. Ricky AJ. Syngkon

Da ki hajar ngut ki paidbah hynne ka sngi kila wan ban sngewlem bad leh donburom khatduh ia ka met basah jong u Dr. Ricky AJ. Syngkon uba dei u MP ka Shillong konstiwensi. Ia ka met basah jong u Dr. Ricky la tep don burom ha u Lum jingtep jong ka Balang Presbyterian ha Sumer. Ha shwa ban rah ia ka met sha u lum jingtep, la leh pyndep ia ka niam ka rukom ka jingiaseng da kaba sdang na iing bad hadien kane Ia leh don burom khatduh ha madan ICAR, Nongsder.Ha kane ka sngi, nalor ki bahaiiing hasem, ki paidbah, ki nongialam ka VPP la wan synran lang ruh da ki Myntri sorkar, ki MLA, MDC, nalor kiwei de. Haba kren ha kane ka sngi, u para khatduh jong u Dr. Ricky Syngkon u bah Cliffton Syngkon ula ai khublei ia baroh kiba la wan ban sngewlem ban pynshngain ia ka iing ka sem.

U bah Cliffton ula ong ba ka jingkyrkhu kyrpang jong u Blei, ka la pynkiew ia i Bah bah (Dr. Ricky) ha kane ka kyrdan ba mynta bad ula kyntu ia baroh ban bud ia ka nuksa kaba ila pyni ban pynim ia ka kyrteng jong i , da kaba trei shitom, trei hok, im hok ban lehrit bad ban don ka jingsngewlem para briew.U bah Cliffton ula pynkynmaw ia ka jinglong jong u Dr. Ricky ha iing hasem bad kum u hynmen u ju pynkmen ia ki para ha iing bad i ju ri sumar ia baroh ha iing.“ Ha iing i bah bah ilong iba komik bha bad ngi ju rkhie beit haba don ma i bad ha iing lada don ma i ka ju don ka jingshngain bad mynta ngi kynjah shisha shisha. I long ruh u hynmen bym ju klet ha ka jingduwai ia ngi ki para bad ka iing ka sem,” la ong u bah Cliffton.Ula ong ba u Dr. Ricky ula trei shitom na bynta ban wanrah ka jingkylla ha ka jylla bad ula trei hok namar ha ka por ba i don sha Delhi u ju wad ki lad lynti ban kren ban wanrah ki jingmyntoi ia ka jylla.

“ Nga tip ba i dang don bun ki kam ba i dang kwah ban pyndep bad kawei kaba i kham kwah ban leh ban pyndep ka long ha ki jaka khappud, ka koit ka khiah, ka pule puthi bad khamtam ban pynbeit ia ki kynrum kynram ha ka jylla. I bah-bah im ju mutdur ban poi ha ka hima sima hynrei shisien ba i la kut jingmut ban leh, i la trei shitom shisha,” ong u Para jong Dr. Ricky. Ula ong ba na ka liang ka iing, ka la kyntu ia baroh ki seng sain hima sima da kaba pynkynmaw ia ki kyntien jong u Dr. Ricky, ‘To ngin iatreilang ban wanrah ka jingkylla ia ka ri jong ngi ban wanrah ka jingbha ia kane ka ri kaba u Blei ula kyrkhu’.