Tur ki nongdie madan sha ophis SMB, kynnoh ialam bakla u Bah Paul

Ki nongdie madan kiba die jingdie ha ki thain Khyndai Lad hynne ka sngi ki la tur sha Ophis treikam ka Shillong Municipal Board (SMB). Kane ka jingtur ki nongdie madan kiba bun ki dei ki longkmie ka dei ban pan jingpynshai na ka SMB halor ka jingthmu ka Sorkar Jylla ban kynriah ia kumba 200 ngut sha ki 3 tylli ki jaka ba ka Sorkar ka la dep ban ithuh. La iohi ba ki nongdie madan ki la iaid kjat naduh Khyndai Lad bad ki la poi sha Ophis treikam ka Shillong Municipal Board (SMB) ban pan jingpynshai na u CEO hynrei la ioh jingtip ba u don sha Tura. Lah ban kdew ba na ka por sha ka por u Myntri ka tnat Tourism u Bah Paul Lyngdoh u la iai ban ba hapoh u bnai Naiwieng 2024, ka thain Khyndai Lad baroh kawei kan kylla ka jaka iaid kjat (Pedestrian Zone) namar yn kynriah lut ia baroh kiba shong die madan na kane ka thain. Hadien katto katne kynta ba ki nongdie madan ki ia pyrta ha khyrdop ka ophis SMB, u Executive Engineer u Bah FB Chyne u la khot iakren ia ki nongialam ka Meghalaya and Greater Shillong Progressive Hawkers and Street Vendors Association (MGSPHSVA).

Haba kren sha ki lad pathai khubor, ka president jong ka (MGSPHSVA) ka Kong Biolin Pyrtuh ka la iathuh ba ha ka jingialang, la ioh jingtip ba ka SMB kam don jingtip halor ka rai jong ka Sorkar ban kynriah noh ia ki 200 ngut ki nongdie madan napoh ka thain Khyndai Lad. “Na ka por sha ka por u Bah Paul u la ong ba yn kynriah noh ia kita ki 200 ngut nongdie madan ba la ithuh da ka Shillong Municipal hynrei na ka liang ka Municipal pat ka ong ba kam don jingtip. Kita ki 200 ngut tharai ki dei ki ba ha iing jong u Paul, ia kata ruh ngam tip” la ong ka Kong Biolin. Ka Kong Biolin ka la kam ba ki don ym duna ia ka 5000 ngut ki nongdie madan ha kylleng ka Sor Shillong kiba la pynrung kyrteng hapoh ka MGSPHSVA. Ka la iathuh ba ha ka 18 tarik Nailur ka la don ka jingialang jong ka Town Vending Committee (TVC) ba la khot da u CEO ka SMB hynrei kam shym la don kano kano ka rai ban pynkynriah ia ki ba shongdie madan na Khyndai Lad.

“Ka Shillong Municipal kam don jingtip eiei ruh em halor kata ka jingpynkynriah. Ki ophisar ka SMB ki kyndit ba ong ban kynriah noh ia ki nongdie madan ha ka 24 tarik namar 24 tarik ka dei Sngi U Blei” ka la ong. Ka Kong Biolin ka la iathuh na ka liang u Executive Engineer ka SMB ruh u la pynksan ba ia ka rai ban kynriah ia ki nongdie madan kan shong hi ha ka Town Vending Committee (TVC) namar ia ka TVC la thaw katkum ka ain na bynta ka bha ka miat ki nongdie madan hapoh ka Nongbah Shillong. Ka la iathuh ba haduh mynta ka Survey ia ki jaka bad ia ka jingdon ki nongdie madan kam pat kut bad haduh mynta ki nongdie madan kim pat ioh ia la ki License (Identity Card). “U Bah Paul um dei ban kren bakla kumto namar ka jingkynriah ia ki nongdie madan kan shong beit ha ka TVC hadien ba la pyndep lut ia ki jingdonkam baroh na ka bynta ka bha ka miat ki nongdie madan” ka la kynthoh.