Ka jingthep kyrteng jong ki kyrtong ban iakhun ia ka ilekshon MDC ka ban sa long ha ka 21 tarik Rymphang sha KHADC ka la sdang naduh mynta ka sngi 27 tarik Kyllalyngkot. Ha kane ka sngi sdang jong ka jingthep kyrteng, uwei na ki kyrtong uba la pynthikna ban iakhun ia ka ilekshon dei u Dr OS Jyrwa uba la thep kyrteng kum u kyrtong shimet ban aireng na Sohryngkham konstitwensi. U Dr Jyrwa hynne ka sngi, ula thep kyrteng ha u Returning officer ha DC office, Shillong. Haba kren hadien ba la dep thep kyrteng, u Dr O S Jyrwa u la ong ba ka jingmih jong u shakhmat ban ia khun ia ka ilekshon MDC ka dei hadien ba ki paidbah ka konstitwensi ki la ai mynsiem ia u ba u dei ban mih shakhmat ban tynrong ia ka jingeh ki paidbah. Halor ka jingshongshit party ki paidbah, u Dr Jyrwa ula ong ba ka jingshongshit jong ki paidbah ka sah ha ki paidbah hi, hynrei u ieng ban iakhun ha la ka jong ka nongrim ban ai ka jingshakri sha u paidbah.
” Ka jingshongshit ki paidbah ha u Prah, ha ka Kti ne ha ka Bom, ngim lah ban tip hynrei nga ieng halor ka nongrim ban ngin trei bad pan jingkyrshan na ki paidbah ha la ka nongrim ba nga ieng,” ong u Dr. Jyrwa. U Dr Jyrwa u la iakhun ruh ia ka ilekshon MLA na Mawrtngkneng ha u snem 2023 na ka seng UDP, ha kaba u la wan ba ar, bad ha kane ka kynti ba mynta u khmih lynti ban ioh ia ka jingjop kum u MDC.Ha kajuh ka por u bah Daniel Wahlang hynne ka sngi, ula leit ban thep kyrteng ha ophis Deputy Commissioner, Shillong kum u kyrtong shimet na Mawsynram konstiwensi. U bah Daniel u dei uwei na ki nongialam barim ka BJP uba la mih noh na ka party bad u dei uwei na ki rangbah ka thain Mawsynram uba la ju iadon bynta ha ki kam imlang sahlang bad ha ki kam paidbah bad kum u nongialam sengbalang ha ki por mynshwa.
Haba kren hadien ba la dep thep kyrteng, u bah Daniel ula ong ba ka dawbah kaba la ktik ia u ban mih madan ha kane ka ilekshon, ka dei namar ba u don ka thong ban pynkhlain bad pynskhem ia ka riti dustur, ki bor synshar hima, bor shnong, bad ki Raid. U la ong ba um lah shuh ban shu peitkai ia ka jingleh jong ki MDC ha kine ki snem ba la leit bad ka District Council haduh mynta ka dang tlot bha.” Ngam lah shuh ban shu peit na jngai namar ba ka District Council kadei ka sobjek kaba khia na bynta ban pynkhlain ia ki mat ha ka longtrai ha ka khyndew ka shyiap bad kiwei de,” ong u bah Daniel. U la ong ba kaei kaba la maitphang u Rev. JJM Nichol Roys, ki MDC haduh mynta ruh kim pat shym lah ban pynurlong. Ula bynrap ba donkam ia ki ain kiba biang bad kiba skhem ban pynkhlain ia ki Hima, ki Raid, ki Shnong hynrei kaba sngewsih ba bun kim pat don ki ain kiba pura. ” Ngi don ki Hima, ki Raid hynrei haduh mynta ym pat don ki ain ki kyndon bad ki shnong ruh kim don bor kim don ki iktiar ban iada ia ki shnong,” ula ong. Ula pynpaw ka jingkyrmen ba watla u iakhun kum u kyrtong shimet, un poi sha ka thong bad la kyntu ia ki paidbah ba lada ki ibit ia u, kin ailad ia u ban leit sha District Council ban iasaid na bynta ki paidbah.