U Kambel Shullai u nonglap ïa ka Crematorium, pynsah nam da u dur mot

Ka Eco-friendly crematorium ne ka “Khnap Thangbru” haka kyntien Jaiñtia, kaba pyndonkam naka bynta ban pyndep khatduh iaka met bala khlad jong u briew daka niam thang, kaba la iarap shibun ban pynduna iaka jinglut ka por, ka pynduna iaka jinglut ki dieng bad lait naka jingtdem bad  kaba la pyndonkam iaka mynta ha kylleng ki jaka ka Jylla dei kaba la lap da u (L) Kambel Shullai uba la kha bad shong sah ha Jowai, kumta hynne ka sngi kaba dei ka lyngkhuh sngi iap ba 13 snem jong u naka liang ka Seiñraij Jowai kum ka dak ban pynsah iaka nam ka burom jong u kala plie ia u mot dur sahnam jong u ba kala shna hajan ka “Khnap Thangbru” ha Dulong Pohhali. Ia une u mot dur sahnam la wan ban plie da u symbud myntri rangbah ka sorkar Jylla u Sñiawbhalang Dhar ryngkat ka jingdonlang u MLA ka thaiñ u Wailadmiki Shylla, u R.S.Gill IFS PCCF & Head of Forest force Meghalaya, u MDC ka thaiñ u Moonlight Pariat, ki nongialam ka Seiñraij Jowai, ki Dolloi ki nongialam niam naki Raij bapher bapher ka Rilum Jaiñtia, kiba shah khot sngewbha bad kiwei.

U Wailadmiki Shylla haba kren u ong, haka jingim briew ngi iohi shibun ki buit stad jinglap thymmai, hynrei bunsien ngi iohi ba kino kino ki briew kiba pyrkhat shaphang ki buit jinglap thymmai ki buh iaka jingmyntoi hakhmat kaba dei naka bynta shimet ym naka bynta u paidbah. Da kaba ai jingiaroh ia u (L) Kambel  Shullai uba don ka jingiohi jngai iaki jingeh ki khun ka Seiñraij Niamtre naka bynta ban  pyndep iaka niam iap ba khatduh da kaba thang namar ka shim por bun kynta nalor ka jingjur ka tdem bad lutphut. Kumta u sngew sarong ia une u ryngbah ba da ka jinglap jong u kala long ka jingkyrkhu lang ia baroh, bad kum ka pateng ba shadien ka burom bakhraw ban siew kylliang ia u ka long ban rah iaka nam ka kyrteng jong u bad ban iada iaka mei mariang. Naka liang u kongsan u Sñiawbhalang Dhar u ong une u briew ula long kum u riewstad  ba pher bha lyngba ki kam jong u, bad jingshisha hi bunsien haka jinglong briew ngi duh jingkyrmen haba ymdon iaka  jingstad,  hynrei ka jingstad bad ka jingnang jingtip ka iapher bha, bad kaba une u Kambel Shullai u don dei ka  jingnang jingtip ba kyrpang ba ula lah ban pynurlong ia kane ka buit phylla ba kyrpang.

Haba u pynkynmaw iaki por ba u juh ia shong iathuh khana bad u Kambel Shullai kum u paralok ba u juh ia ieid bha mynshwa u ong, ka long kaba suk ban ong ba u dei u riewstad ba stad tam, hynrei kaba eh pat hangi ba kumno u don ka jingiaishah haduh ban jop ia kane. Shuh shuh u ong ba une ula dei uwei naki nongialam ba stad tam ba u lah ban  rah iaka nam ka burom jong ka  Rilum Jaiñtia bad ba u long ruh  u briew ba iaishah da kaba rai ban iaishah pynurlong iaka buit namar ba u kwah iaka pateng ba kan suk. Ha kane ka sngi la pynkup burom ruh ia kiba haiing hasem u (L) Kambel Shullai, ka lok jong u bad ia u nongoh shrong pynwandur ia une u mot dur sahnam.