U Prof PS Shukla um dei shuh ban wan phai ha NEHU

Long katba long, u Vice Chancellor (VC) u Prof PS Shukla um dei ban wanphai biang sha NEHU, ne wat hapoh ka Jylla Meghalaya. Ia kane ka kyntien la kren ki Samla Pule, Nonghiai bad ki Non-Teaching Staff ka skukbah North Eastern Hill University (NEHU) hakhmat ka Committee bala thung da ka Ministry of Education ka Sorkar Pdeng. Lah ban kdew ba ka Ministry of Education ka Sorkar Pdeng kala thung Committee ba khlieh da u Chairman barim ka UGC u Prof DP Singh kum u Chairman bad Vice Chancellor barim ka Assam University u Prof Dilip Chandra Nath hadien ka jingiakhih ki samla pule ka NEHU kiba la dawa wengkam ia u Prof PS Shukla. Kane ka Committee kan tohkit bniah halor ka jingkynnoh bym ler kam Prof PS Shukla bad kiwei kiwei ki jingkynnoh jyrsieh hapoh ka skulbah NEHU. Hapoh ka lama jong ka NEHU Students Union (NEHUSU) bad Khasi Students Union-NEHU Unit, bad ka North Eastern Hill University Teachers’ Association (NEHUTA), bad kiwei kiwei ki kynhun kila aiti ia ki kot ki sla kiba kdew ia ki jingkynnoh pyrshah ia ka jingbym ler treikam bad ki jingleh bym hok jong ki bor pyniaid ka NEHU hapoh ka jingialam u Vice Chancellor.

Ki Samla Pule bad ki Nonghikai ka NEHU, kila shim ia ka rai kaba skhem ha ka jingiakynduh ia ki Dkhot ka Inquiry Committee, bad ai ia ka khubor ba ka jingwanphai u Vice Chancellor Prof PS Shula sha ka skulbah ka dei ka bym iahap bad ka bym lah ban pdiang, kampher ia kaei kaba mih na ka jingtohkit. Haba kren shaki lad pathai khubor u President ka NEHUSU u samla Sandy Sohtun u la ong “Ngi la pyni ia ki sakhi satar halor ka jingpyniaid kam bakla jong u VC ha kine ki laisnem bad aiti ruh ia ki dorkhas kiba naduh u snem 2022. Ka khubor ka long kaba shai “ Ngin nym shah shuh ia u ban wan phai sha kane ka skulbah, kam pher ia kaei ka jingshem jong ka Committee”. U President ka NEHUTA Prof Lakhon Kma ula pynsngew ia kajuh ka sur bad ong “Ngi la batai ia baroh ki jingleh bakla jong u VC- na ka jingthungkam ba shah liang sha ka jingpynduh ia ka hok ban kiew kyrdan. Ula ialam ia ka NEHU sha ka riat bah bad ka jingwan phai jong u ka dei kaba la pyrshah da baroh kynthup ia ka NEHUTA, NEHUNSA, NEHUSU bad Wat ka Mawlai Town Dorbar”.

Ki Samla pule kiba la pynsangeh shipor ia ka jingiakhih shah thngan ba khlem pud namar ka jingsngewkhia ia ka koit ka khiah, kila rai ban bteng beit shakhmat ia ka jingiakhih da ka jingbym leit shong klas. U Sandy ula ong ba ia ki sienjam ba hadien habud yn sa shim rai ha ryngkat ka jingiasyllok bad ki Samla Pule. Kane ka Committee la khmih lynti ba kan aiti shen ia ka kaiphod hynrei kaei kaba pa pynpaw da ki kynhun bapher bapher na NEHU ka long ba kim kwah shuh ia u Prof Shukla ban dang wan phai.