Ujor ka ARMPF sha u DC ia ki kam tih khyndew beaiñ ha Raid Marwet

Da ka jingsngewkhia kaba jur halor ka jingiai bteng ka jingtih khyndew beaiñ ha kiba bun ki Shnong kiba hap hapoh ka thaiñ Raid Marwet, mynta ka sngi ki nongialam jong ka All Raid Marwet People Federation (ARMPF), ki la leit ban ujor syndon sha u Deputy Commisioner ka Ri Bhoi District bad ban dawa ruh ban shimkhia pynsangeh noh marmar ia katei ka kam ha katei ka thaiñ.Ha kane ka jingleit ban ujor sha u DC na ka liang ARMPF la lamkhmat da u President Bah Rink Sohpdang, u Komol Shakwa, Secretary lem bad kiwei kiwei ki dkhot kiba la aiti syndon da ka jingthoh jingujor halor ka jingdon ka jingtih khyndew beaiñ ha ka thaiñ Marwet ia kaba la aiti ha u Abhilash Baranwal, DC ka Ri Bhoi District.Haba kren bad ki Nongthoh Khubor, u Bah Rink Sohpdang nalor kiwei ki nongialam ki la pynpaw ia ka jingsngewkhia kaba jur halor ka jingjur ka kam tih khyndew beaiñ ha kiba bun tylli ki bynta jong ka thaiñ Raid Marwet bad ruh wat harud u surok bah National Highway kata naduh Jorabat terter shaduh Khanapara.
Ki la pynpaw ruh, ba kane ka kam tih khyndew ka la ktah shikatdei ia ki paidbah nongshong shnong kane ka thaiñ namar bun ki la mad ia ka jingkyrduh um, ka jingpynjakhlia ia ka mei mariang bad wat ka jingshlei um kaba shyrkhei, da kaba bynrap ruh, ba wat ba ka Assam ka la kynnoh ia ka jingtih khyndew ha kane ka Raid Marwet ba ka ju wanrah ia ka jingshlei um ha Guwahati kaba la ktah shikatdei ia ka burom jong ki nongshong shnong.Shuh shuh ruh, na ka liang ki nongialam ki la bynrap, ba bun ki nongshong shnong kane ka thaiñ kim dei kiba don ba em ban tih um lyngba kita ki kor ki bor kumba don ki katto katne ki riew don spah bad ia kane ka kam tih khyndew la kynnoh ba la shu leh da ki riew heh spah kiba khwan myntoi shimet, kumta ki la kyrpad ia ki bor ka aiñ ba kin shimkhia ban tohkit ia kane ka kam tih khyndew beaiñ ha kane ka thaiñ Raid Marwet, ki la pynpaw ruh ba watla la dep ban ujor sha u Ranger ka Tnad Forest ha 12 Mer hynrei kam shem la don satia kano kano ka jingshimkhia tad haduh kane ka por.
Na ka liang u Deputy Commisioner, u Abhilash Baranwal, haba kren bad ki Nongthoh Khubor, u la pynpaw ba u la ioh ia kane ka jingujor halor ka jingdon jong ki kam tih khyndew beaiñ ha ka Raid Marwet bad kumta un sa shimkhia ban pyntip sha ki bor ba halor ka tnad Forest ban pynlong ia ka jingtohkit bad lada lap ia ka jingshisha na ka liang ki bor district kin sa shim pat ia ki lad ki lynti kiba tyngeh.