Ujor ka FKJGP ba duh bording khah khah ha Ri Bhoi

Ka jingduh bording khah khah ha ka them Ri Bhoi District khamtam sha ki thaiñ nongkyndong ka la pynsyrtok shikatdei eh ia ki nongshong shnong khamtam ki khynnah skul, halor kane ka jingeh ki nongialam ka Federation of Khasi Jaintia and Garo People (FKJGP), North Khasi Hills District ki la leit ban ai dorkhas sha u Deputy Commissioner ka District ban dawa shimkhia halor kane ka jingeh ba ki paidbah ki mad na ka por sha ka por. Ha kane ka jingiakynduh ia u DC, u Abhilash Baranwal, na ka liang ka FKJGP la lamkhmat da u Samla Ricky Majaw, General Secretary ka North Khasi Hills District lem bad kiwei kiwei ki dkhot ha kaba la aiti ia ka dorkhas bad ban dawa ban shimkhia mardor ban weng ia kane ka jingshah pynduh bording kaba khah khah.

Haba kren bad ki Nongthoh Khubor, u Samla Ricky Majaw, u la pynpaw ia ka jingsngewkhia kaba jur halor ka jingeh ba la hap ban mad da ki paidbah khamtam ki khynnah skul, kito kiba trei ba ktah da kaba pyndonkam bording namar ka jingduh bording ilektrik kaba khlem lah ban pdiang satia ha kane ka district khamtam ha ki shnong nongkyndong.”Ngi da ka jingsngewlyngngoh kaba khraw ba ka jinglip bording ilektrik ka la long thamula pynban, namar tang da slap malu mala, ne shit kyrang ne wat haba beh lyer malu mala ruh ka bording ka duh bad ka jingduh bording ka neh da ki kynta kynta”, kren diaw u Samla Majaw, da kaba bynrap ba ka seng ka dawa mardor na u khlieh ka district ban tuklar mardor halor kane ka jingeh jong u paidbah.

Ha kawei pat ka liang, ka FKJGP, ka la pynpaw ruh ia ka jingsngewkhia hakhmat u DC halor ki jingduna kiba don hapoh ka District Library ha Nongpoh, ha kaba la kynthoh ba katei ka Library ka dei kaba la shu ieng tang kum ka building hynrei ka dap shibun ki jingduna kumta la kyrpad na u DC ba un shimkhia ban pynbit pynbiang noh ia ki jingduna ha kane ka library khnang ba ki paidbah kin ioh jingmyntoi na kane ka library.