Ujor PIL u Bah Banshai Marbaniang sha HC halor ka jingpyntreikam ia 259 ki bos STPS

U Nongialam ka Awaken Indian Movement (AIM), Meghalaya u bah Banshai Marbaniang, ula mudui da ka Public Interest Litigation (PIL) ha iing Kashari jong Meghalaya High Court halor ka jingtreikam jong ki bos Shillong Public Transport Service (STPS). U bah Marbaniang ha ka PIL ba la mudui, ula pynpaw ia ki jingeh kiba jur ha kaba iadei bad ka jingtreikam bad jingpyniaid ia ka STPS Bos, kaba la sdang ha u snem 2011–2012 hapoh ka jingpynthymmai ia ki sor da jingpyntreikam ia ka skhim paidbah ka Jawaharlal Nehru National Urban Renewal Mission (JNNURM) ryngkat bad ka bynta jong ki bos rong saw kiba kyrpang.

Nalor kane, ha ka PIL ba la mudui, u Bah Banshai Marbaniang ula pan na ka Ïingkashari halor ka kaiphod kaba bniah halor ka jinglong jingman bad jingpyntreikam jong baroh 259 tylli ki bos STPS, ka jingpynshai halor ka jingpyndonkam ia ka pisa ba la ioh na ka bynta ka skhim, ban don ka jingtohkit kaba laitluid halor ka jingsuba ba don ka jingpyniaid bakla bad ka jingbamsap, ban pynthymmai bad pyntreikam biang mardor ia ki bus na ka bynta ban pyndonkam paidbah. Ula pynpaw ka jingsngewkhia halor ka jingpyndonkam ia ka mang tyngka kaba la pynlut haduh kumba T.68.17 klur ba la mang na ka bynta ban thied ia ki 259 tylli ki bos.

“Kane baroh ka la wanrah ban buh ia ka jingkynnoh bamsap bad jingpyniaid bakla ba la suba ki kynthup ia ka jingpyndonkam bakla ia ki mar ki mata bad ka pisa paidbah, ka jingbym don ka jingkhuid jingsuba na ka Sorkar Jylla bad ka Meghalaya Urban Development Authority (MUDA),” ong u bah Banshai Marbaniang ha ka kyrwoh khubor. Na ka liang u bah Banshai Marbaniang ula khmih lynti ba ka Meghalaya High Court kan rah ia kane ka kam ban shong bishar ha kine ki taiew ban wan. Ula kyntu ruh ia ki paidbah nongshong shnong ba kin wan shakhmat ban kyrshan ia ka Public Interest Litigation (PIL).