Wanrah u CEM da ka Resolution, dawa ban pynshai ka Sorkar halor ka IMA

Ka Iingdorbar jong ka Khasi Hills Autonomous District Council (KHADC) hynne ka sngi ka la mynjur ia ka Official Resolution ban dawa na ka Sorkar Jylla ban pan jingmut shwa na ka District Council ha shwa ban pynkupbor ia ka Investment Meghalaya Agency (IMA) ban thied jaka na ka bynta ki nongbei tyngka (Investor) na bar ka Jylla. Ia kane ka Official Resolution la wanrah da u Chief Executive Member (CEM) ka KHADC u Bah Pyniaid Sing Syiem bad ka iingdorbar ruh ka la mynjur ban dawa na ka Sokar Jylla ban shim jingmut shwa na ka KHADC ha shuwa ban pyntreikam iaka IMA. Haba kren shaphang ka Official Resolution u Bah Pyniaid u la ong ba ki jaka, khyndew bad shyiap hapoh ka Jylla ki hap hapoh ka jingpeit jong ki Dorbar Shnong, Dorbar Raid, Dorbar Hima bad ïa kane la ithuh da ka khyrnit ba hynriew ka riti synshar ka Ri India kaba la ai bor ia ka KHADC ban iada. U Bah Pyniaid ula ong, ka jingpynkupbor ia ka IMA lyngba Meghalaya State Investment Promotion and Facilitation Act, 2024 ban thied jaka kan iatyngkhuh bad ki kyndon hapoh ka Khasi Hills Autonomous District (Regulation and Administration of Land) Act, 2021, bad kan ktah ruh ia ka jingsngew jong ki paidbah trai jylla.

“Ngim pyrshah ia ki kam pynroi ban kiew ka ioh ka kot jong ka Jylla bad ki NongShong Shnong hynrei kita ki kam pynroi ki ban wan lyngba ka jingpynkupbor ia ka IMA kim dei ban iatyngkhuh bad ki ain ka KHADC kaba dei ban iada ia ka khyndew ka shyiap hapoh ka rilum Khasi” la ong u Bah Pyniaid. Haba kyrshan ia ka Official Resolution u Nongialam ka Liangpyrshah u Bah Titosstarwell Chyne u la ong, ba ka Sorkar Jylla ka dei ban pan jingmut shwa na ka District Council hashuwa ban pyntreikam ia ka IMA. “Ngi sngewthuh ba ka thong jong ka Sorkar Jylla ka dei ban khring ia ki nongbei tyngka ban wan shna karkhana ban kyntiew ia ka ioh kam ioh jam hynrei kata ka thong pat kam dei ban tyngkhuh bad ki ain ka District Council kaba dei ka nongiada ia ka khyndew ka shyiap” la ong u Bah Titos.

U Bah Titos u la ong ba ka jingpynkupbor ia ka IMA ka dei ban ai bor ia ka ban thied jaka namar kata ka Sorkar Jylla ka dei ban pynshai. “La ka Sorkar Jylla ka dang donkam ne em ban ioh jingbit na ka KHADC, ki Hima, ki Raid, ki Rangbah bad kiwei kiwei ban thied jaka katkum ki kyndon ka KHAD (Regulation and Administration of Land) Act 2021″.U la ong ka dei ka kamram jong ka Sorkar Jylla ban pynshai halor kane khnang ban ban weng ia ki jingartatien ba ka jingtreikam jong ka IMA ka lah ban iatyngkhuh bad ki ain ka KHADC.