Wanrah u CEM da ka Resolution, dawa ban pynshai ka Sorkar halor ka IMA

Ka jingbna nam ka Hima Nongkhlaw kum ka Hima ba Khrawbor hapoh ka ri khasi jaintia kaba la pynmih ia u syiem Tirot Sing kum u khlawait bad u nongialeh laitluid ka jaitbynriew kam shem la kut tang hangta hynrei ha kane ka kynti ba mynta, ka Hima Nongkhlaw ka la ioh ban thaw sa ia ka History ban long ka Hima kaba Nyngkong eh napdeng ki Hima hapoh ka ri khasi jaintia ban rakhe ia ka jingdap 500 snem jong ka Hima. Ia kane ka Quincentinial Jubilee jong ka Hima Nongkhlaw la sdang ha ka 19 tarik u nohprah 2024 ha ka jingialang ba la pynlong ha Madan Mot Tirot kaba don ha Mairang Mission ha kaba shim bynta ki syiem na ki Hima bapher bapher kiba hapoh ka ri khasi jaintia, ki officer sorkar, ki samla pule na ki college bad ki khun ki hajar ka Hima Nongkhlaw.

Ha kane ka sngi plie, u syiem ka Hima Nongkhlaw u Paiem Phrestar Manik Syiemlieh u la ioh ban pynher ia ka lama Quincentinial Jubilee bad ruh ban pyllait paidbah ia ka logo jubille bad ha ka jingiashim bynta lang ki syiem na ki hima bapher bapher la ioh ruh ban pynher iaki 500 tylli ki balloon jubilee. La pynishongkun ia ka program ha kane ka sngi da ki jingrwai bad shad tynrai na ki samla pule bad na ki khun ki hajar ka hima kiba la don bynta lang ruh haka jingleit buh syntiew ha khmat u mot dur shi rynieng jong u syiem Tirot Sing ha Mairang.

Shuh shuh ka tyllong khubor ka iathuh ba ka Hima Nongkhlaw kan bteng ban pynlong ia ka jingrakhe jubilee 500 snem da ki program ba pher bapher ia kaba yn pynlong ha kylleng ka Hima bad yn pynkut ha ka 17 tarik u Naitung, 2025 kaba dei ruh ka lyngkhuh sngi iap ba 190 jong u syiem Tirot Sing.