Wanrah u MLA ïa ka skhim ba palat T. 3 klur ban shna 2 tylli ki surok

U MLA ka North Shillong u bah Adelbert Nongrum ha kane ka sngi Saitjain ula wanrah ia ka skhim kaba T.3.35 klur na bynta ban pyntrei ia ar tylli ki surok hapoh ka konstiwensi. Kitei ki ar tylli ki surok ban pyntrei kiba kynthup ka surok iaid kali na Jaiaw Shyiap ka ban mih sha jan iingmane Riatsamthiah, bad kawei ka surok rit ba lait tang ki ar shaka na jan Riatsamthiah Community Hall Riatsamthiah sha jingkieng Wahingdoh,.

Kine ki skhim ba u MLA u la wanrah ki dei lyngba ka Grand in Aid na ka tnat Pynroi Sor, ia kaba yn pyntrei hapoh ka jingkhmih ka Municipal kaba long T.1.2 klur ka surok kali na Jaiaw Shyiap sha Riatsamthiah kaba dei ka phase na nyngkong, katba na ka bynta ka surok arshaka na Riatsamthiah sha jingkieng Wahingdoh la ioh lyngba ka Infrastructure Development jong ka tnat Pynroi Sor kaba long T.1.69 klur bad T.1.26 klur ruh na ka Infrastructure Development ka tnat Pynroi Sor ka ban long na ka bynta kiwei ki kam pynroi naduh ki nala ki lynti iaid kjat bad kiwei kiwei ki jingdonkam.Haba kren ha kane ka sngi, u MLA ka North Shillong ula ong ba kane kadei ka kamram jong u ban buddien bad ban pynurlong ia ki jingdonkam jong ki paidbah hapoh ka konstiwensi.

U Bah Adelbert u la kyntu ia ki kontraktor ba kin pynthikna ba ki kam pynroi ki dei kiba skhem ba neh bad ba shngain na ka bynta ka jingmyntoi ki paidbah.Ha kajuh ka por, ula ai jingiaroh ruh ia ki dorbar shnong bad ka seng kynthei kiba la treishitom na ka bynta kane ka jimgdonkam ha ka shnong.Ha kane ka sngi la ioh ruh ka jingkren na u Rangbah Shnong ka Riatsamthiah, u Bah Mariahom Kharkrang, Rangbah Shnong ka Jaiaw Shyiap, Bah Francis Mairom, nalor kiwei de ki riew Rangbah.